Aizawl June 16, 2023 : '9 Years Modi Government Celebrations Campaign' programme kal mekah vawiin khan BJP Mizoram All Morcha buatsaihin BJP State Office, Upper Republic-ah hun hman a ni a, Morcha hrang hrang te report ngaihthlak a nih hnua thusawitu Vanlalhmuaka, State President chuan Modi kaihhruai BJP sawrkar hnuaiah India ram chu ram ropui leh ram hmasawn a ni tawh niin a sawi.

Vanlahmuaka chuan, "India ramah Pu Modi kaihhruai BJP-in Sawrkarna kan chan hnu ah India ram chu nasa takin kan thang a, khawvela ram ropui kan tih te nen intiat renga kan awm theih tawh avangin India ram chu ram ropui kan ni tawh a, ram hmasawn kan ni tawh a ni. PM Modi-a kaihhruaina hnuaiah mi retheite'n nitin kan khawsakna awlsam zawkna atana ka mamawh - Free Gas Connection te, Electric Connection te, Water Connection te, Farmer te PM Kisan kal tlanga puihna te, Inthiarna/Toilet mumal nei lo India ram ah tam tak kan awm avangin chung chhungkuate tan chuan Scheme tha tak te min buatsaih sak bawk a, tin heng bakah mi retheite hamthatna PM Modi-a chuan a nei bawk a ni," a ti a.

Hmuaka chuan sawi chhunzawmin, "Hetiang tak hian India ram chu Development ah a thang nasa a, nimahsela Mizoram ah erawh Thingtlang a kan unau chhungkaw harsa tak tak te chu Mizorama Sawrkar chuan a nihna angin a pe thei lo mai ni lovin, Central atanga sum awmsa vek tawh pawh Mipui hnen a thlen theih thin loh avangin BJP kan Sawrkar chuan PM Scheme kaltlanga chhungkaw hmasawnna tur te chu a nihna angin kan pe dawn a ni," a ti bawk.

Vanlalhmuaka chuan, "Tunlaia hian India ram pumah '9 Year Modi Government Celebrations Campaign' programme hun hman mek a ni a, Mizoram ah pawh he hun hi hman niin, tun thla June 30 thleng Programme hrang hrang duan sa a awm a ni," a ti bawk.