ZALEN April 4, 2025; All Mizoram MR Teachers' Association (AMMTA) chuan thuchhuah siamin, muster

roll (MR) zirtirtute chu group B employee (MR status)-a dah an nih avangin provisonal employee (PE)-ah dah theih an nih loh thu leh, kum 5 an thawh tawh avangin an awmna tur dik takah sawrkarin a dah an beisei thu an tarlang.

AMMTA chuan, tun hnaia Mizoram State Legislative Assembly pakuana session vawi linaa unstarred question chhanna chanchin thara puan, 'Sawrkar hmasain MR zirtirtute chu Regularisation Scheme-in a huam loh tura lâk an nih avangin regular-a dah tumna a awm rih lo' tia puan chu MR zirtirtute dinhmun mek nen inmil tâwk lo a awm nia an hriat thu an sawi.

School Education directorate-in July 5, 2019-a MR zirtirtu lakna tur advertisement a chhuahah, MR zirtirtu lakte chu MR Regularisation-in a huam lo ang tih a nih thu tarlangin, AMMTA chuan, "Hetiang a nih mek hian September 5, 2023-a DPAR (Administrative Reforms Wing) Under Secretary-in kan zawhna min chhan dan chuan, 'MR Regularisation Scheme-in a huam chin chu group C leh D-te chauh a ni a, MR teacher-te tan awmzia a awm lo' tih a ni," an ti a; MR zirtirtute chu group B employee (MR status)-a dah mek an nih thu an tarlang. 

AMMTA chuan, MR zirtirtute chu group C/D an nih loh avangin PE-ah dah luh theih an ni lo tih tarlangin, "Sawrkar hian a duh phawt chuan contractual basis-ah min dah thei a, chu hun thlir chuan taima takin kan hnaah kan bung mek. Kum 5 chuang kan service ve tawh avangin sorkar hian kan awmna tur dik takah min dah ngei kan beisei tlat a ni," an ti.