Aizawl February 10, 2024 : Mizoram State Commission for Women (MSCW) in police a complaint an thehluh hnuin, Instagram account pakhat atanga mipat hmeichhiatna hmang lai live a tihchhuaktu, hmeichhe pahnih chu Zirtawp zan khan man an ni.

Cyber Crime police hotute hnen atanga ZALEN thudawn danin, tunhnaia live video siamtute zing a mi, hmeichhe pahnih chu February ni 9, 2024, Zirtawp zan khan Thuampui leh Falkland veng atangin man an ni a, nimin khan court ah thawn an ni. Inhnamhnawih dangte pawh chhui zui mek zel an ni.

MSCW) chuan tun hnaiah Mizo hmeichhia ni ngeia ngaih pakhatin social media kaltlanga mipat hmeichhiatna lam hawi a tihchhuah avangin Zirtawpni khan suo moto-in thubuai an lo ziaklut tawh a, video kawl zawng zawngte delete turin an ngen.

MSCW chuan mipat hmeichhiatna kaihhnawih video live-a tichhuaktu hi Instagram-ah chuan 'pui_puii_chhakchhuak' aka 'zolanu' tih nia a lan thu tarlangin, "Video hi sum hmuh nan a hmang nia ngaih theih turin a live video en duh tan man chawia en theihna a tlangzarh hmasa niin a lang. Chumi hmang chuan ualau takin man chawitute hmuh theih turin mipat hmeichhiatna mawi lo taka hman zui niin a lang. Chu thil chu social media platform hrang hrangah a darh ta a ni," a ti.

Thil thleng hi an ngaimawh takzet tih tarlangin MSCW chuan, "Hetianga ualau taka mipat hmeichhiatna hmang lai phochhuah leh thehdarh hi hmeichhe zahawmna tihbawrhbanna nasa tak a nih avangin suo moto-in thubuai ziahluh a ni. Hetiang thil hi a pawi hle a, dan palzutna lian tak a ni," an ti a, hetianga mipat hmeichhiatna chungchang social media-a vawrhdarh leh thawn darh hrim hrim hi dan palzutna lian tak, na taka hrem theih a nih thu an tarlang.

MSCW tarlan danin, hetianga social media kaltlanga video tarlangtu leh hmangtute lakah hian suo moto case pawh an lo siam tawh thin a, chu mi hmang chuan Mizo hmeichhia, video siamtute pawh pawh police-in manin, lung inah khung pawh an lo ni tawh.