Jharkhand-a Bokaro district-ah Inrinni tuk khan Muharram lawm tura inbuatsaiha pungkhawmten electric chak tak kalna hrui an tawh palh avangin mi pali an thi a, mi dang 10-in hliam an tuar bawk tih police-in an sawi.

Chhiatna hi state khawpui, Ranchi atanga km 80 vela hla, Khetko khuaa thleng a ni a. Thira a ngul siam sakhaw flag an zarna lamah hrui hi an tawk palh niin Bokaro Superintendent of Police Priyadarshi Alok chuan a sawi.

“Inrinni zing dar 6:00 vela Muharram lawm tura an inbuatsaih laia thleng a ni a. An flag ngul hi thira siamniin volt 11,000 zet kalna electric wire hrui an tawh vang a ni,” tiin PTI a hrilh.

Hliam tuarte hi an zavaiin an bul hnai damdawi inah kalpui nghal an ni tih a sawi.

An zinga pariat chu Bokaro General Hospital-ah hruai an ni a, mi pali thiin pathum dang pawh an dinhmun a tha vak lo niin officer hian a sawi bawk.