Houston, Texas, United States-a rimawi kûtpui  (music festival)-a entu mipui innek buaina thlengah mi pariat an thi a, tam tak an hliam bawk.

Travis Scott-a Astroworld tan zanah hian a entute hi dawhsan hma lama awm inchuha an tlan khawmna atangin hetiang chhiatna hi a thleng ta niin thuneitute chuan an sawi.

Thawk lam buaina avangin mi 11 chu damdawi inah lak an ni a, mi pariat an thi.

Mi 50,000 vel telna festival-ah hian mi dang 300 velin taksa pem leh kak vel an nei bawk.

Tual chhunga politician pakhat, Harris County-a judge Lina Hidalgo chuan thil thleng chu a rapthlakin ‘chhiatna zan rapthlak tak’ tiin a sawi.

“Kan thinlung a na tak zet,” a ti a. “Mipuiten he thil hi hun hlimawm ni turah ngaiin intihhlim nan, hriat reng tur thil thlentirna atan an beisei a, hetiang chhiatna leh thihna hial hi kan beisei phak lo,” a ti.

Chhiatna hi Zirtawpni zan dar 9:15 (India-a Inrinni zing dar 7:45) vela thleng niin Houston Fire Chief Samuel Peña chuan a sawi.

“Mipuite hian dawhsan hma lam an pan ruih ruih a, chuta tang chuan an innek buai zo ta a ni,” tiin thuthar lakhawmtute a hrilh a. Mi thenkhat an talbuai tak atang hian mi dangte chuan mahni sahimna zawnga an theih anga tlan darhin chhiatna lian zawk a thleng ta niin Peña chuan a sawi.

Houston Chronicle-in a tar lan dan chuan he festival huaihawttu ber, Travis Scott-a hian minute 75 chhung hun a hman turah dawhsan hma maia mipui innek a hmuh avangin vawi eng emaw zat a chawl lailawk hman.

Rapper hian venhim hnathawktute chu mipuite an him leh him loh zawtin pui turin a hrilh bawk.

Emergency vehicle, light leh alarm a ri sek a, hei hian zai pawh vawi tam a tibuai niin a tar lang.

Ni hnih chhung neih turin festival hi huaihawt ni mah se Inrinni kha chu thulh a ni.