Myanmar buaina: Sipai dotuten ASEAN ring lo

Admin - Jun 05, 2021

MYANMAR BUAINA KAL ZEL - Sipaiten nikum inthlana Aung San Suu Kyi kaihhruai party-in hnehna an chan dan fel lo awm tia sorkar an paih thlak hnuah vawiin thlengin sipai chet dan duh lohna lantir zel a ni | Kum 1962 leh 2011 inkar zawng sipai rorelna hnuaia lo awm tawh, Myanmar-ah hian sipai sorkar chuan kum hnih chhunga mipui rorelna a awm theih nan inthlan huaihawt an tiam | ASEAN aiawhin an tlawh hi April thla tawpa Jakarta-a an intawh khawm tuma Myanmar chungchanga thutlukna panga an siam anga an kalpui a ni a, hetah hian Min Aung Hlaing pawh a tel | ASEAN hian sipai sorkar bakah sipaite duh lotu aiawhte leh mi dang an kawmin an hmu tel dawn em hriat a ni lo | Sipaite hian anmahni duh lohna lantirtu mi 845 an that tawh a, mi 4,500 chuang an man bawk niin NGO chuan an sawi a, sipaite erawh chuan an pha thung.

ASEAN aiawhten Myanmar sipai roreltu, Min Aung Hlaing-a Naypyidaw-a an hmuh mek laiin sipai sorkar dotu pawl chuan ASEAN-ah rinna an nghat ngam lo tih an sawi.

Association of Southeast Asian Nations (ASEAN) hian February 1-a Myanmar sipaiten mipui rorelna  paih thlaa thuneihna an chan chungchangah hi a hmunah mi turin dinhmun an en thlithlai mek.
“ASEAN hmalaknaah hian beiseina chhe te kan lo nei a, kan beiseina chu a thamral ta a ni,” tiin mipui sorkar, National Unity Government (NUG)-a Deputy Foreign Minister Moe Zaw Oo chuan Zirtawpni khan a sawi.

Sipai sorkar hian anmahni dova mipui sorkar din hi ram phatsannaa ngaiin an member-te pawh ‘firfiak’ tiin a sawi.

“ASEAN hian ruahmanna fel fai engmah a nei lo,” tiin Moe Zaw Oo hian a sawi.

Moe Zaw Oo hian an ramah sipaiten internet an tithi deuh vek chungin online-in thuthar lakhawmtute a kawm a ni.

Myanmar-a inbiakpawhna hmanrua tihthih hi venhimna thil vang niin an sawi tih Reuters news agency chuan a tar lang.

Zirtawpni khan sipaihotu, Min Aung Hlaing hian ASEAN Secretary-General Lim Jock Hoi leh ASEAN-a chair ni lai, Brunei Foreign Affairs Minister Erywan Yusof te chu a kawm niin sipai enkawl, Myawaddy TV chuan a tar lang.

An inkawmnaah hian nunaute tawrhna chungchang te, inthlan chu chungchang te, nikum inthlana dik lo awm nia sawi, sipaite hetianga an chet chhante an sawi.

Share now