Myanmar hruaitu hlui, Aung San Suu Kyi chu an ram sipai sorkarin thubuai hrang hrang 19-a thiam loh an chantir avanga a tan hun tur an bituk chu kum ngain an titawi.

Ngaihhnathiamna hi tih dan thin pangngai (seasonal amnesty) niin kum 33 lung in a tan tur chu kum rukin a tawi dawn ta a ni.

President hlui, Suu Kyi-i ang bawka paih thlak, Win Myint pawh thiam loh a channa pahnihah ngaihdam a ni bawk.

Hun bik neia inngaihdamna, ngaihhnathiamna hi a hma pawhin lo puan tawh thin a ni a; mahse, tun tum hi Suu Kyi-i leh Myint-a an tel vawi khatna a ni.

Sipai sorkar chuan heng ngaihhnathiamna hian ram dangin an thlirna pawh a tihdanglam theih an beisei.

Kar hmasa khan Suu Kyi-i hi tan in atangin an khawpui, Nay Pyi Taw-ah pawn chhuak thei lo tura sawn a ni.

Kum 78 mi ni tawh, Nobel Peace Prize dawng tawh, Suu Kyi-i hi February, 2021 khan sipai chakna hmanga paih thlak a ni.

He thil thleng avang hian tual chhung buaina chhuakin mi sang tam tak an thih phah tawh.

Sipai sorkar hian anmahni duh lo leh dodaltu mipuite lakah tharum an hmang nasa niin an sawi.

Ram thenkhat, a langsar zingah China leh Thailand te chuan sipaite hi an dawr tawh a; mahse, kum 2020 inthlanpuia chiang taka hnehna chang, Suu Kyi-i leh an party an tih danah erawh an lungawi chuang lo.

Sipai sorkar hian Thawhtanni khan August thlaa neih tur inthlan chu a sawn leh tawh bawk.