August 23, 2022; Kar kalta chhung a khapna hnuaia a ruka tawlh Myanmar kuhva bag 395 police ten an man hnuah, nizan khan Saitual police team te chuan Saichal khaw kawngpuiah Myanmar kuhva bag 110 leh a neitu bakah lirthei khawlhtute an man chhunzawm. Hetihlai hian North Tripura a Zampui Mizo Convention Youth Wing chuan khawchhak kuhva dan loa tawlh/a ruka phurh chu an duh loh thu leh an dodal zel tur thu an sawi.

Saitual police team te chuan nizan khan chuan Saichal khaw kawngpuiah lirthei lian chi pahnih atangin kuhva bag 110 an man a, kuhva rah neitu leh lirthei khalhtute, Lalchhuanawma (24) s/o Lalmuana Champhai, Zotlang leh Ramdinthara (34) s/o Hrangzuala te man tel nghal. Dan bawhchhiatna chi hrang hrang tihtawp nan englaipawha mipui puihna an mamawh reng tih police thuchhuah ah tarlan a ni.

Tarlan tawh angin kar kalta chhung khan Khawlzawl district chhung Tuipui khaw bulah Myanmar kuhva bag 265 leh Zawlnuam ah bag 130 man a lo ni tawh.

Hetihlai hian Zampui Mizo Convention Youth Wing (MC-YW) chuan thuchhuah siamin, khawchhak kuhva dan loin West Phaileng - Tuipuibari - Kawnpui - Zampui kawng kaltlangin phai lamah a ruka phurh thlak (smuggled) thin a ni tih an hriat thu leh an duh loh takzet thu an tarlang.

MC-YW chuan, "Dan lova thil tih a nih avang leh, Zampui tlangin kan kuhva tharchhuah ve te hralh, phurh leh hlutna (rate) te nasa taka a nghawng chhiat theih avangin kan duh lo takzet," an ti a, kuhva phur tute man chhuah an nih a, dan anga hrem an nih theih nan theihtawpin hma an la zel dawn tih an thuchhuah ah chuan an tarlang bawk.