October 18, 2022; Myanmar kuhva vangin, Mizoram a tharchhuah kuhva te chu state pawnah thawnchhuah theih a ni lo a, hemi vang hian kuhva huan siam a eizawng chhungkaw tam takin harsatna an tawk mek.

Hachhek Bial Kuhva Chingtu Pawl (HBKCP) hruaitute hnen atanga ZALEN thudawn danin, tunlaiin kuhva rah hmin hmasa te chu lawh tan a ni a, chungte chu hnamdang sumdawng ten lei sak tan mah se state pawn (Assam) ah luh pui theih a ni lo a, hetiang a Assam lamin an lo dan nachhan hi Myanmar kuhva tawlh nghawng nia ngaih a ni.

An kuhva thar chhuah te state pawnah kalpui theih a nih loh avangin Hachhak bial chhung a kuhva huan siam a eizawng chhungkaw 6,000 vel te chu mangang takin an awm mek a, a rah lawh hun vanglai January - February chho thleng a an harsatna sutkian a nih loh chuan dinhmun khirh taka ding thei an ni.

Hachhek bial ah hian nikum khan an kuhva thar atangin cheng nuai sang 2 an lei tling a, kuminah cheng nuai sang 3 lei thei turah an inngai. 

HBKCP president Biakvullura chuan engtia hmalak zel tur nge tih ngaihtuahna an hmang mek tih sawiin, "Kan buai khawp mai, kan mangang a, Myanmar kuhva tawlh vang ni berin kan hria," tiin, "Keini mai bakah, Tripura state pawhin harsatna an tawk mek," a ti bawk.