mi suala puhna

A hming tak Maung Kyaw, Phyo Zeyar Thaw tia hriat lar hi November khan an khawpui lian ber, Yangon-a apartment-ah sipaiten an man.

Kum 2015-a an ramin mipui rorelna lam a hawn khan parliament member atan thlan a ni a. Man a nih lai hian pistol pahnih, a mu leh M-16 rifle a lo kawl niin sipaite chuan an sawi a, venhim hna thawktute beih dan tur a ruahman niin an puh.

Kyaw Min Yu-a ve thung hi 1988-a zirlaiten sipai rorelna duh lohna an lantir lai atanga hriat hlawh a ni a, October thla khan man a ni.

Myanmar-a sipai rorelna hun hmasaa thleng, ;88 Generation’ movement tia a huaihawttu hi social media-a mipuite fuiha buaina siamah puh a ni.

------------------------

Myanmar-a sipai court chuan Aung San Suu Kyi kaihhruai National League for Democracy (NLD) party MP, mipui rorelna a awm theih nana nasa taka beitu ni bawk chu thi turin a ti.

Phyo Zeyar Thaw-a hi November khan man niin an rama Counterterrorism Law hmangin thi tura hrem a nih thu sipai hotute thuchhuah chuan a tar lang.

Ko Jimmy tia hriat bawk, mipui rorelna ram din a nih theih nana beitu dang, Kyaw Min Yu pawh hetiang bawk hian hrem a ni.

Puak thei, bomb leh firfiakte puitua puh an ni a; mahse, heng an puhna leh an chunga thu an rem dan kalhmang hi pawn lam atanga hriatpui theih a ni lo. Min Yu-a nupui, Nilar Thein chuan October khan a pasal an puhna hi dawt vek a nih thu a sawi.

Myanmar ram hi nikum February 1-a Min Aung Hlaing-a hova sipaiten mipui thlan, Suu Kyi-i kaihhruai mipui sorkar paihthlaa thuneihna an chan hnuah buaina hrang hrangin a tuam.

Sipaite hian anmahni duh lotute chu nasa taka bei letin mi sang chuang an man tawh a. Civil mi 1,500 dawn thah an ni tawh.

Phyo Zeyar Thaw leh Kyaw Min Yu te hi tun hmaa sipaiten thuneihna an chan hmasak pawh khan hun rei tak tan ina lo tang tawh an ni a, tuna thuneihna an chan leh hnua thi tura tih langsar ber an la ni a. Myanmar-ah hian kum tam tak chhung chu thi tura hrem hi an awm tawh lo a ni.