Aizawl: Vawiin January 2, 2024 khan Arakan Army nen an indona avanga Mizorama tlanchhia Myanmar sipai 151-te chu Lengpui tumhmun atangin Myanmar thlawhna hmangin an ramah phurh haw an ni.

The Lawngtlai Post chanchinbu tar lan danin December 29, 2023-a Arakan Army nen an inkahna avanga Lawngtlai district-a Tuisentlanga lut Myanmar sipai 151-te hi Myanmar thlawhna hmangin tum hnih thiarin, a tum khat nan sipai 84 phurh chhuah an ni a, a tum hnihnaah sipai 67 chu phurh chhuah leh an ni.

Myanmar sipaite hi an awmna hmun, Parva epa Myeik Wa Camp an tih mai chu December 29-a Arakan Army hel pawlten luh chhuaha an laksak avangin Tuisentlang khuaah an lut a. A tirah mi 83 lut phawtin zan lamah mi 68 an rawn lut leh a, an vai hian mi 151 an ni.

An zingah hian hliam pakua an awm a, chung zingah chuan hliam na zual pali an awm bawk.

Myanmar sipaite hian ralthuam chi hrang hrang rifle 93, pistol 17, Rocket Propelled Grenade (RPG) pali, mortar pali, Medium Machine Gun (MMG) pahnih, Light Machine Gun (LMG) panga, sniper rifle pali leh hand grenade 374 te an luhpui a ni.