ASEAN summit-ah sipai ten tel an phut

ASEAN chuan an summit neih leh turah Myanmar sipai sorkar aiawh an sawm lo va, sipai sorkar erawh chuan  sawm ngei an phut tih an sawi.
    Asia chhimchhak lam ram 10 inzawm khawmte hian Myanmar-a sipai sorkar chet dan an pawm lo tih leh civil mite tawrhna leh tharum thawhna thleng nasa an pawm lo tih lantir nan sipai sorkar sawm lovin an ram aiawh turin politics-a inhmang lo an sawm a, eng pawl nge tih erawh sawi a ni rih lo.
    Hemi chungchangah hian sipai sorkara foreign ministry chuan thuchhuah siamin ASEAN member rama sorkar hotute mipuite chuan an pawlah tel turin zalenna inang khat vek an nei tih an sawi a, sawm leh sawm loh bik awm chu an pawm thei lo.
    “Hetiang a nih chuan Myanmar hian summit-a thil sawi leh relte chu kan pawm dawn lo va; ruahmanna siam, thil tum leh ASEAN Charter-in kalphung a neihte hi a dodal dawn a ni,” a ti.
    Khawvel ram tam takte chuan ASEAN hi Myanmar ram telna pawl a nih avangin an rama tharum thawhna leh mipui tawrhna a tawp theih nana hmala turin nasa takin an nawr ve mek reng a ni.

United Nations chuan Myanmar tual chhung buai mekah an ram sipai tam tham takin hmar an pan ruih ruih avangin nunau tawrhna nasa tak a thlen a hlauthawng hle.

February thlaa sipaiten Asia chhimchhak lam ram thuneihna an chan hnuah anmahni dodaltu mipuiten an tuar nasa tawh hle.

UN Special Rapporteur on Myanmar Tom Andrews chuan Zirtawpnia General Assembly-a Myanmar-a mihring dikna chanvo kalpui dan report a pekah sipai tam takin an ralthuamte nen  Myanmar hmar lam leh hmathlang an pan tih a sawi.

A hriat dan chuan sipai sorkar hian mihring dikna chanvo a palzut nasain indonaa tul lo taka pawikhawihna (war crime) a ngah tawh hle niin a sawi.

“Kan inbuatsaih a ngai a, helai biala Myanmar mite pawh an inbuatsaih a, pawi lian tak a thlen a rinawm hle a, ka rinna hi a dik loh hram ka beisei a ni,” tiin Andrews thil thleng thei chungchang a sawi.

Tual chhunga thil thleng thlithlaitute chuan sipai sorkar hian civil mi 1,100 an that tawh a, mi 8,000 chuang an man tawh bawk niin an sawi.

“Tun tuma sipaite chet vel dan hi kum 2016 leh 2017-a Rakhine state-a Rohingya mite laka an chet vak dan nen khan a inang chiah,” tiin Andrews chuan a sawi.

Kum 2017 khan Rakhine state-a cheng Rohingya hnamte hi sipaiten tharuma beiin mi 7,40,000 chuang an raltlan phah a. Sipaite chet dan hi UN chuan a hlawma mi suatnaah a puh.

Andrews chuan ramte chu Myanmar sipaite pawisa, ralthuam leh an mamawh dang ang ngaihtuahsak lo turin a ngen a. Hetianga tih hi a sawt tih sawiin an tih tawh rah chu kartir lama mi tang an chhuah kha a nih thu a sawi.

Thawhtanni khan Myanmar military chief Senior General Min Aung Hlaing chuan anmahni do avanga an man mi tang mi 5,000 chuang an chhuah dawn tih a puang.

An mi mante an chhuah tur thu an puan hma lawk hian Asia chhimchak lam ram intelkhawm, Association of Southeast Asian Nations (ASEAN) chuan an summit neih turah Myanmar ram sipai sorkar aiawh an sawm ve dawn lo tih an puang a ni.