Myanmar sumdawnna khawpui, Yangon-a lung in, February thlaa sipaiten mipui sorkar an paih thlak hnua an mi mante an dahna berah COVID-19 a darh nia sawi a nih avangin mi tangten buaina nasa tak an siam.

Asia chhimchhak lam ramah hian February 1-a sipai sorkar a din hnua hetianga chetna a thlenna hmasak ber a ni a. Tun hnaiah hri kai hi an pung chak hle.

Britain-in a awp lai atang tawha tan ina hman, Insein Prison-a tangte hian a chhung atangin sipai sorkar an duh lohna an au chhuahpui thawm hi pawn atangin a hriat theih a. Zirtawpni zinga an au pawh social media-ah a video hrang hrang thehdarh a ni.

Thailand-a hmunpui nei, mihring dikna chanvo humhalhna lama thawktu, Assistance Association for Political Prisoners (AAPP) chuan lungawi lohna hi women’s detention block atanga intan a ni a, prison staff member pawh tirh luh belh an ni tih a sawi.

Myanmar Prison Department-a Deputy Director Chan Nyein Kyaw chuan sorkar chanchinbu, Myawaddy hnenah lung ina buaina a awm thu hi a siam a. “Inbiak a ni a, mi tangte thil phut pawh pawm a ni,” a ti.

AAPP chuan sipauten Zirtawpni zing khan tan in hi an pan a, hmanrua (staff weapon) pawh an keng lut niin an sawi.