DOWNLOAD OUR APP

Read latest news on your phone
play-store app-store
app-store
MYC Super IAS 20 te exam dang vangin dan an bawhchhe lo -MYC Chairman
Tualchhung
Mar 26, 2022
Aizawl: Mizoram Youth Commission Chairman Dr Vanlaltanpuia chuan, "MYC Super IAS 20 te hian UPSC 2021 an tlin loh chuan kum thum dang (2022-2024) preliminary exam an bei leh tura tih niin hemi karah hian state level competitive exam emaw exam dang an ziah phalsak an ni a. Heng exam te an ziah avang hian kan agreement an bawhchhe lo a ni," a ti.
 
Nimin Serkawn, Lunglei a Mizoram Youth Commission Incubation Centre tur lungphum a phumna ah he thu hi sawiin MYC Chairman chuan MYC Super IAS 20 atana thlanchhuah 20 te hi MYC sponsor in Delhi ah thla thum (February – March 2021) coaching zuk kalin MYC nena agreement an neih ang ngei in UPSC Preliminary Exam 2021 chu an zavaiin an ziak vek tih a sawi a. Super IAS hi zau zawka kalpui tum niin Super IAS 40 kalpui turin budget ah cheng vaibelchhe 2 dah fel tawh a nih thu sawiin chhimlam District zirlai te lo ngaihven ve ngei turin a chah a ni. Dr Vanlaltanpuia chuan MYC Incubation Centre-ah hian thalaite hmasawnna tura hmalakna hrang hrang competitive coaching, Information Technology, skill development leh entrepreneurship-te a len vek tur thu sawiin residential tura ruahman a nih thu a sawi a. Thalaite hmakhua ngaia an ram phal taka pe tu Serkawn khawtlang te chungah lawmthu sawiin an ram pek chu human resource tih hmasawnna kawngah leh kan ram economy than len zelna kawngah tangkai taka hman anih tur thu a sawi.
 
Lunglei High Powered Committee Vice Chairman Lawmawma Tochhawng pawhin thu sawiin MYC hnuaiah thawktu staff tlem te chauh awm mahse Mizo thalaite tana an hmalakna a hlu in a chhuanawm tak zet a ni, a ti a. "Lunglei khawpui ah zirna in changtlung tak Incubation Centre kan nei tur chu kan vannei tak zet a, mipui ten kan hlut a kan hman tangkai thiam a tul dawn a ni," tiin Lunglei District thalaite chu tun aia hawizau tur leh tih tak takna nena hma la turin a sawm a ni.

Latest News & Chhiar Hlawh