ZALEN November 2, 2023 : Vawiin khan MZP Conference Hall-ah Mizo Zirlai Pawl (MZP) Executive Meeting vawi - 624 (2023-2025 term a vawi 2)-na neih a ni a. November 3, 2023 hma ngeiin Tribal Scholarship la sem loh zirlaite hnenah pek a nih theihna turin na tak nawr ni se an ti.

Meeting hi H.Lalthianghlima, President in a kaihruai a, Meeting chuan, Tribal Scholarship Second installment tun thlenga la sem loh chu, November 3, 2023 ral hma ngeia zirlaite Bank Account a luh loh chuan hma lak ngei ni se tia a lo sawi tawh chu, na taka nawr nise a ti a. Zirlaite dikna chanvo humhim anih theih nan hmalak zui zel nise tia rel a ni.

Meeting chuan, NESO Executive Council Meeting ni 31 October, 2023-a Gauwahati a neihin a rel tawh angin, Manipur buaina chinfel thuai a nih theih nan— ‘Demonstration for Peace and Parmanent Solution for Manipur' chu ni 9th November, 2023 hian North East state dangte rualin Aizawl-ah pawh neih ve ngei nise an ti.

MZP Inter High School Quiz, kum 2010 aṭanga kumtin buatsaih thin chu, meeting chuan December thla chhung hian neih leh ngei ni se a ti a. School hrang hrangte lo inbuatsaiha tel ṭheuh turin a sawm nghal bawk.