ZALEN January 8, 2026: Mizoram University Non Teaching Staff Assopciation (MUNTSA) chuan vawiin khan MZU Finance officer lak thuah thil felhlel a awm nia an hriat avangin MZU Vice Chancellor pisa kawtah an lungawilohna entirin an pungkhawm. Vice Chancellor chu Offer of Appointment a pek tawh hnuk kir (revoke) turin an ngiat bakah MZU Chief Rector Larsap chu enquiry committee din turin an phut bawk.

MUNSTA thuchhuahin a tarlan dan chuan June Ni 16, 2025 khan MZU Finance Officer lakna atan Interview neih a ni a. Felfai taka thil kalpui ni tura an rin laiin, candidate thenkhat atangin thil fel lo awm niawma thudawn anih bawhzuiin MUNTSA chuan a chhui chiang ta a. Dan bawhchhiatna a awm ngei a ni tih finfiahna an neih hnuah lehkha hmangin MZU Vice Chancellor hnenah, FO hna lakna kal mek chu MZU Dan bawhchhiatna a awm avanga cancel a, a bul atanga ti tha leh tura ngenna an lo siam tawh a. Heng an hmalakna te hi vawiin khan thuchhuah siamin an tarlang bawk a, an punkhawmna hmunah an sawi nawn leh bawk a ni.

MUNTSA chuan hemi chungchang hi July Ni 14, 2025 Executive Council meeting vawi 68-naah pawh ngaihtuah niin, Selection Committee minutes (Sealed envelope) pawh hawng rih lo a, Ministry of Education lama thlen turin rel a ni. Hetia Ministry thu nghah mek a nih lai hian Vice Chancellor in hmanhmawh takin Special Executive Council meeting, Sept Ni 10, 2025 khan a ko leh a. Executive Council Member thenkhat remti lo chungin sealed envelope chu a hawng lui ta a. Draft Executive Council minutes a chhuah rual hian member thenkhatin thutlukna an pawm loh thu an ziak a ni.

MUNTSA hian lehkha hmang bawkin Vice Chancellor hnenah ngenna tum 2 dang a pek leh bakah Vice Chancellor hi vawi thum ngawt an sawipui tawh a. An inhmuh hnuhnung berah Vice Chancellor chuan Ministry ah engkim a thawn thlak tawh thu leh ngaihtha taka lo awm tura a tiam a. Hetiang a nih mek lai leh Ministry thu ziaka dawn hriat a nih loh laiin, December 2025 khan, result puan awm lo leh Executive Council member te hnena Special Executive Council meeting minutes pawh thawn a nih hmain, N.Albert Khizo, Nagaland University Finance Officer tanglai hnenah Offer of Appointment a ruk a rala pek a lo ni ta a. He thu hi MUNTSA hruaitute chuan Vice Chancellor aw ka ngei atangin January Ni 5, 2026 khan a hria, hei hian a thawng hle a ni.

Hemi chungchanga MUNTSA in lungawilohna an lantir nachhante chu hengte hi an ni e.

MZU Statutory Rules pal zutna:

1. Vice-Chancellor chuan Registrar mawhphurhna bil ni thin, MZU Statute 4(7) leh 4(8)-in a sawi angin, Executive Council meeting koh leh minutes thawnchhuah chu verbal instruction-in Prof. Elangbam Nixon Singh hnenah a hlan a. Hei hi MZU dan (Statutes) kalh leh thil awm ngai loh a ni.

2. Thuneitu sang zawkten tawngka (verbal) chauhva thupek an pek reng reng chu, a hnuah ziaka (written) confirm (nemngheh) leh siloh hi Central Sawrkar rules (DoPT guidelines) kalh a ni.

3. Prof. Elangbam Nixon Singh hi Screening Committee a Member Secretary atan Vice-Chancellor in ziakin a ruat a, Screening hna zawh anih hnu pawhin Selection Committee-ah "Member Secretary" angin a la tang zui zel a. MUNTSA RTI zawhna MZU thuneitute’n min chhan dan leh MZU Statute 18(2)C angin, Finance Officer Selection Committee-ah hian Member Secretary awm theihna dan (provision) a awmlo hrim hrim a ni. Tin, MUNTSA-in Vice Chancellor an zawhin, pawmna awmlo takin tawngka (oral instruction) a Member Secretary hna lo thawk chhunzawm tura Prof. Nixon-a a hrilh thu a sawi.

4. Registrar hi Finance Officer lakna a Selection Committee member a ni lo chungin, Vice Chancellor instruction in Selection Committee member-ah thut tir ve a ni a, hei hi MZU Stattute 18(2)(C) kalh a ni a. Hemi chungchangah hian Vice Chancellor chuan “In good faith/good intension” a a tih thu a sawifo a, MUNTSA chuan “In good faith/good intension” a thil tih hi dan bawhchhiatna laka himna a nilo tih hi pawmdan a ni.

5. Ministry of Education guidelines chuan Executive Council meeting koh dawnin ni 15 tal advance-a hriattir chhuah (notify) tur a tih laiin he guidelines hi ngaihpawimawh lohin Vice Chancellor chuan ni 15 a ral hma ni 10 September, 2025-ah khan Special Executive Council Meeting hi a ko a, Executive Council member thenkhatin hawnglo tura an ngen chung chungin, Vice-Chancellor duh dan in Finance Officer lak na tura Selection Committee Minutes (Sealed envelope) chu hawn a ni.

6. Prof. Elangbam Nixon Singh leh candidate pakhat Mr. N. Albert Khizho-te hi inzawmna (official connection) nei sa an ni a; Prof. Elangbam Nixon Singh hi Nagaland University Finance Committee-ah Member a ni a, Mr. N. Albert Khizho hi Nagaland University-ah Finance Officer/Member Secretary, Finance Committee a ni mek bawk. Heti chung hian, Prof. Elangbam Nixon Singh hi fair taka thil kalpui anih theih nan MZU-a Finance Officer selection-a a a mawhphurhna atanga inhnuk dawk (recuse) tur a beisei a nih laiin, a in hnuk dawk chuang lo.

7. Selection Committee-a Expert pakhat Prof. G.P. Prasain hi Prof. Nixon Singh-a Ph.D. supervisor a ni a, amah hi Tripura University-a Vice Chancellor anih lai pawha mahni chhungkhat duhsak (nepotism) leh corruption case a hmingchhiatna nei mek a ni.

8. Prof. Elangbam Nixon Singh hian Expert-te thlenna leh motor khalhtute phone number thlengin a lo zawt chhuak a, heng thil hi thuruk anga vawn thin a ni a, MZU Establishment Section-a a khawihtute, mi tlemte, lohtheihlohte chauh kutah dah thin a ni.

9. Mita hmutute sawi danin, June 15, 2025 zan (interview hma zan) khan Prof. Elangbam Nixon Singh hi University Guest House, Visitor's Nominee leh Expert-te thlenna hmunah hmuh ngei a ni.

10. WhatsApp screenshot-a a lan danin, Prof. Elangbam Nixon Singh hian concerned officials hnen atangin Expert-te thlenna hmun details a dil ngei a ni.

11. Candidate dang pathumte’n selection process-ah diklo awm ni a an hriat chungchangah representations an thehluh chu Executive Council meeting vawi 68-naah ngaihtuah leh sawiho a ni lo.

12. Executive Council member 5-te’n Finance Officer lakdan chungchangah pawmlohna (dissent notes) ziakin an thehlut a. Chuti chung pawh chuan, Vice-Chancellor chuan Special Executive Council Meeting-ah hian Finance Officer thlanna (Minutes) chu a hawn tir lui a ni.

13. Mizoram University kalphungah chuan Group ‘A’ leh a chunglam lak dawnin, Executive Council in Selection Committee recommendation a pawmna minues chu notify hmasak phawt a, result pawh official-a puan hmasak phawt a ni thin. Mahse, tun tumah hi chuan Executive Council Member dangte pawh hriattir chuang lovin (Minutes pe lovin), hmanhmawh taka a ruk a ralin offer of appointment pek chhuah a ni.

14. Finance Officer lakna a thuneitute thil kalpui danah hian MZU tihdan phung pangngai perhsan deuh hlir a nih avangin, ngaihthat thlaklohna tur leh thil felhlel inphumru awm niin an ngai nghet tlat a ni. Finance Officer lakna a thuneitute thil kalpui danah hian MZU tihdan phung pangngai perhsan deuh hlir a nih avangin, ngaihthat thlaklohna tur leh thil felhlel inphumru awm niin an ngai nghet tlat a ni.

i) Vice Chancellor hian Offer of Appointment Mr. Albert N Khizo hnena pek tawh hi hnuk kir (revoke) leh ni rawh se.

ii) Inquiry Committee (Member 3 tal awmna) din turin Chief Rector, Mizoram University, Hon’ble Governor, Mizoram ni bawk chu an ngen a, Inquiry Committee member atan Mizoram sawrkar hnuaia Senior Officer, service matter lama thiamna nei leh Dan hremi ruat ni se kan ti bawk a ni. Inquiry Committee hian uluk leh hleih nei miah lovin, he Finance Officer lakdan chungchang hi a chhui tur a ni.