Aizawl : Mizoram University chuan Mizoram chhim lamah a huang a zauh thei dawn ta a, January 17, 2020 khan Ministry of Human Resource Development, Government of India chuan a thuphungin Lunglei khawpuia MZU Campus din a phalna chu MZU Vice Chancellor hnenah ziakin a hrilh.

Higher & Technical Minister Dr. R. Lalthang-liana chuan January 17, 2020 khan New Delhi-ah Ministry of Human Resource Development Joint Secretary, JC Hosur chu hma chhanah a hmu a, kum 10 chuang zet MZU Southern Campus din theih nana sorkar laipuia Mizoram Vice Chancellor leh mi thahnem ngaite thlen thin leh Mizoram sawrkar Chief Minister Pu Zoramthanga pawhin sawrkar laipuia a lo a thlen tawh chu a hrilh nawn leh a, Jt. Secretary (Central Universities etc), Human Resource Development hian Minister hi MZU Southern Campus din phalsakna Approval Letter a tih chhuah sak nghal a ni.

Lungleia MZU Campus dinna tur ram hi State sorkarin a thlawna a pek tur niin MZU Vice Chancellor chu chutiang ram a awm leh awm lohte enfel turin a hriattir nghal a ni. February, 28, 2018 khan Higher and Technical Education Jt. Dirrector R. Lallianzuala ; MZU Associate Professor, Prof. Jamal Hussain; Pukpui VC member te bakah Eric R. Zomuanpuia, General Secretary Chhimbial Chhantu ; Chawngchhuana, Secy. Chhimbial Chhantu ten Mizoram University Southern Campus hmun tur atana Pukpui khawtlangin an pek hmun an thlirho tawh a ni.

Lungleia University Campus a awm theihna atan hian MZU neih hma, NEHU hunlai atangin hma lak a lo ni tawh a. 2001 a MZU din a nih khan Lungleia MZU Campus a awm theihna turin theih tawp chhuah chhunzawm. Chhimbial Chhantu meeting hian MZU Southern Campus din anih thuai theih nan Chief Minister leh Member of Parliament pahnih te chak zawka hmalakpui tura an lo ngen tawh thin bawk.