Aizawl June 17, 2023 : Nimin lama Leimin avanga Sairang kawngping chu a la tlang lo a, he thu buatsaih lai pawh hian thenfai hnathawh mek zel a ni a, Leimin-in kawng a hnawhpin avang hian Bungrua phur eng chi a kal theih loh avangin engemawzat chu kawng lakah an tangkhang mek a ni. Leimin avang hian Petrol pump thenkhat te pawhin stock an nei tawh lo.

Leivung paihfai hna hi Mizoram PWD, National Highway Division - I ten an thawk mek a, thlang lam leh chhak lam atangin paihfai hna thawh niin Leivung paihna a hlattham avang leh Ruah a sur thin avangin duh angin PWD hotute chuan an thawk theilo tih an sawi a, zan lamah Leivung paihfai hna hi thawh ngam a nih loh thu an sawi bawk. 

Vawiin lamah hian Leivung paih hna hi an beisei anga an thawh thei a, harsatna dang a thlen belh loh chuan Lirthei kaltheia an laihtlang an beisei tih PWD hotute chuan an sawi a ni.

Vaivakawn YMA huaihawt vawiin hian leimin na hmun bul hnaia In chim hlauhawm nia hriatte thiah a ni dawn bawk, In pahnih chu dinhmun derthawng-ah awm niin vawiin hian pakhat chu thiah phawt tum a ni.

Lirthei tangkhang Silchar lam atanga rawn chho hi Rangvamuala Ch Chhunga Truck Terminal ah dahkhawm niin heta leng lo hi kawngdung sir ah din tir anni a, Aizawl lam atanga Silchar chhuk tum te chu Traffic Police te ruahmanna in World Bank Road lamah din tir an nih thu Traffic hotute chuan an sawi bawk.