Aizawl July 18, 2023: Chief Minister Zoramthanga hovin vawiin khan CM Conference Hall-ah Vairengte-Sairang inkara national highway siam hna thawh tura sawrkarin ram a lak tur (land acquisition)/compensation a pekna tur chungchang ngaihtuahho a ni.

Meeting-ah hian NHIDCL in Vairengte leh Sairang inkara 4-lane kawng siam hna an thawh tan theihna tura harsatna awm thenkhat leh sutkian a nih theih dan te sawiho a ni a. Stakeholder hrang hrang te'n an ngaihdan leh harsatna tawhte an sawi a, NHIDCL lamin clearance an neih theih nan a dilna an lo thehluh tawh te thlirho a ni a, hna thawh thuai an beisei thu an sawi hlawm a ni.

Meeting-ah hian Advisor to Chief Minister C. Lalramzauva, Principal Secretary Forest Dept. RK Singh, PWD Secretary K. Lalthawmmawia, Kolasib District administration leh Competent Authority for Land Acquisition (CALA) aiawh te, 4-Lane paltlang tur Kolasib district chhung khaw hrang hrang atanga ram neitu aiawh te, tlawmngai pawl leh khawtlang hruaitu aiawh te an tel a ni.