Pathiannia assembly vote tlate chhiarah BJP chuan state palia pathumah hnehna an chang dawn tih a chiang tawh a, state 12 zetah anmahniin ro an rel dawn tihna a ni ta a. National party zinga lian ber dawttu, Congress erawh Rajasthan leh Chhattisgarh an hloh hnuah state pathumah chauh ro an rel dawn ta.

Delhi leh Punjab-a rorel mek, Aam Aadmi Party (AAP) chu national party zinga a lian pathumna a ni mek.

Sorkar laipuia a fawng chelhtu ni mek, BJP hian Uttarakhand, Haryana, Uttar Pradesh, Gujarat, Goa, Assam, Tripura, Manipur leh Arunachal Pradesh-ah thuneihna an chang mek a, Pathiannia vote chhiarah Madhya Pradesh an la kir a, Congress kut atangin Rajasthan leh Chhattisgarh an chang dawn ta bawk.

BJP hi state pali - Maharashtra, Meghalaya, Nagaland leh Sikkim-ah te rorelna fawng chelhtu zingah an tel bawk.

Congress hian state pathum - Karnataka, Himachal Pradesh leh Telangana-ah anmahni pualin thuneihna an chang mek a, hetih lai hian Telengana-ah rorel lai, Bharat Rashtra Samithi (BRS) an paih thla a, thuneihna an chang thei dawn.

Congress hi Bihar leh Jharkhand-ah party dang thawhpuiin roreltu zingah an tel ve mek bawk a. Tamil Nadu-ah an thawhpui, DMK-in ro an rel bawk a; mahse, chhim state-ah hian sorkarah erawh an tel ve lo thung.

Pathiannia result chhuak taah hian Congress-in an chanpual an hloh nual avangin AAP chu eptu party zinga lian ber pawl dinhmunah a hlan kai phah thung.

“Vawiina result a chhuah takah chuan state pahnih, Punjab leh Delhi-a roreltu, Aam Aadmi Party hi India hmar lama eptu party lian ber a ni ta a ni,” tiin an hruaitu zinga mi, Jasmine Shah chuan X-ah a tar lang.

India-ah hian tun dinhmunah national party paruk - BJP, Congress, Bahujan Samaj Party (BSP), CPI (M), National People’s Party (NPP) leh AAP an awm mek.

Assembly inthlan thawh dang hi kum 2024-ah a awm leh dawn a. Sikkim, Arunachal Pradesh, Odisha leh Andhra Pradesh te chu inthlan hmabak an ni a. Jammu & Kashmir inthlan tur erawh tihkhawtlai rih a ni.

Tun tum inthlanna state-ah hian MP ni laiten an chuh nual a, an tling a nih chuan Lok Sabha-a an thutna a ruah a ngai dawn a. Nakum chawhma lamah ram inthlanpui a awm dawn avangin Lok Sabha bye-election awm lovin nghah a nih erawh a rinawm zawk.