Aizawl July 11, 2024 : Serchhip DC kaihhruainaa din District Task Force on Child and Adolescent Labour chuan vawiin khan Serchhip khawpui chhung hmun hrang hrang tlawhin dan kalha naupang chhawr luih - child labour a awm leh awm loh an enfiah.

Tukin zing dar 10:30 khan an Chairperson Paul L.Khuma, Serchhip DC chuan Serchhip DC Office tualzawl atangin fehchhuak te hi a vailiam a ni. He Task Force-ah hian police te leh sawrkar department hrang hrang official te bakah tlawmngai pawl hruaitute an tel a ni.

Vawiina fehchhuak zingah hian Serchhip Sub Headquarters YMA hruaitute, police te, I&PR te leh Serchhip District Child Protection Officer leh a staff te an tel a ni. New Serchhip area atanga bul tanin kawngpui dunga dawr te, thingpui dawr te, hotel te, workshop te an tlawh chhuak a. Heng hmunah te hian naupang kum tling lo hnathawka chhawr an awm em tih an enfiah a ni.