FAKE encounter

India-ah police-ten mi sual laka beihpui an thlak hi ‘encounter’ an ti a. Mi sualte lakah hian a lemin beihpui thlakin an that fo thin nia sawi a ni a, hetiang hi ‘fake encounter’ an ti thung.
    Tun tuma thil thleng pawh hi a lem a nih an ring fur a. Pawikhawihtua an puh hi an man vek tawh a, an kuta a awm laia thatin mahni intihlum angin an lantir ta mai niin an ngai hlawm.
    Tun tum hi Hyderabad-a police-in pawngsualtua puh an thah vawi khatna a ni lo va. December, 2019 khan hmeichhe kum 27 mi pawngsualtua puh mi pali chu an lo that tawh.
    Heng mite hi an man a, an pawikhawihna hmunah hruaiin an that a. Tlan chhuah an tum a, an inbeih 

India chhim lam, Telangana-tawnna lamah an that ta niin police chuan an sawi a; mahse, mi tam tak chuan ‘fake encounter; a nih an ring a, hmeichhe naupang pawngsualtua puh chu relkawngah a ruang hmuh a ni a, police chuan amah intihlumin rel tlan kaiin a zuang lut niin sawi mah se a chhungte leh mihring dikna chanvo humhalhtute chuan police hian beiin an that ‘fake encounter’ zawk niin an sawi.

Hmeichhe naupang kum ruk mi hi kar hmasa khan an in atangin a bo va. Darkar rei vak lo hnuah tuna thi ta, an thenawm mai inah hian a ruang hmuh niin post-mortem atang chuan khawih chhiat ngei a nih thu leh a thih chhan hi reh hlum nhiin a lang.

He thil thleng hi mi tam takin demin state pumah politician, Telugu cinema actor leh mi dang dangte chuan naupang chunga dikna hlen chhuah a nih theih nan an che chhuak a. Social media-ah pawh a titu chu thi tura hrem turin an ti nasa hle bawk.
    A titua puh chenna, Hyderabad-a mi chu mipui thinrimin suasamin a bungruate chu khawlaiah an theh chhuahsak a. Mi tam tak chuan kum 30 mi thihna hi police-in a dera tlanchhiattirin an that a nih an ring.

India-ah hian mipuiin an thlawp em avanga police-in mi an thah hi a thleng fo va, a bikin naupang pawngsualtu leh rawng tak tak che thinte hi court thlenpui hmain hetianga lemchanga thah hi an awm fo thin.

Kum tin pawngsual sang chuang a thleng a, thuremna a muang si a, kum tam tak, a chang phei chuan kum 10 chuang ngaihtuah thin a ni.

Police hian kar tirah khan a titua puh hi a thlalak tichhuakin a lumanah Rs. maktaduai khat an chhiar.

Ningani khan police hotu lian pakhat chuan Pallakonda Raju-a ruang hi an chhar thu leh an endiknaah mahni intihlum ngei a nih thu a sawi a. A tattoo atangin amah a ni tih an finfiah tih a sawi bawk.

Police hotu lian pakhat chuan rela thawk pakhatin Raju-a hi relkawng bula a kal a hmuh thu leh a chhan hmain rel tlan laiah a zuang lut hman tih a sawi.

Hetih lai hian mi tam tak chuan an man tawh a, an that a, intihlum angin an lantir niin an ngai.

Raju-a nupui chuan Ningani khan police hian a pasal hmu turin station-ah an ko tih a sawi a. Mi thenkhat chuan Pathianni khan state minister pakhat, KT Ramarao chuan Raju-a hi pawi a khawih hnu lawkah an man tih Twitter-ah  a  tar a; mahse, a hnu lawkah siam thain zawn mek a nih thu a tar lang tha leh niin an sawi bawk.

Raju-a ruang hmuh a nih hma ni hnihah khan state Labour Minister Malla Reddy chuan an man ngei tur thu a tar lang ve thung bawk.

Hyderabad-a sociologist leh lawyer Prof Kalpana Kannabiran chuan police hian ‘fake encounter’ a nih lohzia an fiah ngei a ngai tih a sawi.