ZALEN April 16, 2025; Nimin April 15, 2025 (Thawhlehni) tlai dar 6:30 khan Ministry of Home Affairs North Block New Delhi-ah, Mizoram a NGO hrang hrang; CYMA, MHIP, MZP leh MSU bakah (ZoRO) aiawh ten Home Ministry ruahmannain Union Home Secretary Pu Govind Mohan ten Meeting an nei a. FMR leh Border Fencing chungchang sawiho a ni. 

Union Home Secretary chuan, Mizoram leh Myanmar inkar hung tura hmalaknaah Mizoram Civil Society (NGO) te thlawpna an beisei tih a sawi a. Dodal lo hram turin a ngen. 

Meeting a tel NGO hruaitute chuan, FMR leh Border Fencing chungchângah hian NGOCC anga ngaihdan awmsa an sawi chhuak a, a tul anga a ram mipuite ngaihdan leh duhdan ngaipawimawh thiam turin an ngen. 

NGO hruaitute chuan Union Home Minister Aizawl a lo zin laia a sawi, Lengpui Airport, Airport Authority of India (AAI) kuta hlan chungchang hmalak tawh dan an zawt a. Mizoram a Drugs hluar lutuk chungchang, Mizoram a Foreigner luh phalna P.A.P chungchang leh pawl hrang hrang hmachhawpte an sawi nawn a ni. 

Union Home Secretary chuan, Lengpui Airport; Mizo mipuite duh dan anga AAI kuta hlan tura an lo sawi tawh angin, hma an lak mek thu a sawi a. Mizoram Chief Secretary chu proposal siam a, a rang lama thehlut tura an hriattîr tawh thu a sawi a, an intiam tawh anga thla thum chhung ngeia hma an lak hman tur thu a sawi. 

Ruihhlo chungchângah Union Home Secretary chuan, Mizoram a ruihhlo hluar lutuk a vei thu leh, Mizo mipui ten nasa taka an do chu lawmawm a tih chu sawiin, sum leh pai leh hmanrua a tul apiang hemi kawnga hmalatute an puih tur thu a sawi a. Narcotics Control Beaureau (NCB) kaltlanga an puih tur thu a sawi.

Tun hnaia Foreign ram hrang hrang atanga, Mizorama lo zin tum ten harsatna an tawh nasat thu leh Mizoram luh phalna dan mumal lo chungchangah hmala turin Union Home Secretary hi ngen a ni a. Home Secretary chuan Mizoram luh phalna P.A.P awlsam zawka lak a nih theih nan ruahmanna a lo siam nghal tur thu leh a enzui turin Intelegent Beaureau Joint Secretary (NE) a ruat nghal

Mizo Thalaite Sipaiah a tam thei ang ber an luh theih nan, ruahmanna siam turin Union Home Secretary hi ngen a ni a. Central Armed Police Force-ah Mizo thalai a tam thei ang ber an luh theih nan Batallion thar din turin hmalak mek a nih thu leh, thla thum hnuah lak tan theih an in beisei thu an sawi bawk. 

Heng bakah hian, Mizoram tana hmasawnna tur hrang hrang; Convention Center sak, Scholarship, Coaching Center leh Sikul tih changtlunna dan tur hrang hrang sawiho a ni. 

Meeting-ah hian, Union Home Secretary hi, heng mite hian an tawiawm:-

1. Director, IB

2. Secretary, Border Management 

3. Advisor, NE

4. DG, BSF

5. DG, Narcotics Control Board

6. DG, Assam Rifles

7. Jt. Secy. BM-1

8. Jt. Secy. S-1/F-1

9. Addl. Secy. (Admin/CIC/NE)

10. Addl. Secy. (SS-2), School Edn. 

11. Addl. Secy. (Tourism)

12. Jt. Secy. (P-2 & CTCR)

#ZalenNews