Aizawl November 16, 2022 : Zo-Fa Tangrual Pawl (ZTP) chuan NHIDCL ten highway 4 lane a siam tura area package an then danah package 1&2 Assam lama a dah ngawt chu thil fel lo a ni, an ti a, official-a ramri chinfel a hnih hma a an duh dana Mizoram leh Assam chin an lo then ngawt chu an pawm loh thu an sawi. 

Nimina thutharlakhawmtute a hmachhawn naah Zo-Fa Tangrual Pawl (Zo-Fa Allied Organisation) Vice President Paul L.T. Chhangte chuan, "NHIDCL-in package 1-4 an lo then hi 1875 Bengal Eastern Frontier Regulation-in Cahcar leh Lushai ramri a siam, Lushai (Mizoram) chhung veka mi a ni a. Keini ZTP chuan Mizoram chhung vekah kan ngai a, chuvang chuan Assam kuta package 1 leh 2 a awm tur hi kan pawm lo a ni," a ti.

ZTP hruaitu chuan, "Assam leh Mizoram ramri official-a siam fel a ni hma hauha Assam leh Mizoram ramri NHIDCL ten an lo thenfel ngawt hi a dik lo, compensate document engkim siam a ni dawn a, Nakina ramri chinfel a nih dawna harsatna min thlen thei tur a nih dawn vangin, keini chuan  tha lo tiin kan pawm lo a ni," a ti bawk.

ZTP chuan kawng tha kan neihna tur pawh ni se,  ram zau tak ziaka Assam lama dah a nih ai chuan he 4 lane kawng hi hnawl ngam rih a tha an ti a, Survey of India in ram chin dik taka min siamfel hnuah Pathian zarah kawng tha tak siamna hun chu a la awm an beisei thu an sawi.

1895 leh 1898-ah chauh Mizoram (Lushai Hills) hi British in a awp tan a, Min awp hma 1877-a kan ram chhunga Reserved Forest an lo siam chu fel lo hle-a an ngaih thu an sawi bawk a ni.