Aizawl February 11, 2024 : Mizoram Legislative Assembly budget session chu February ni 19 atang hian neih tan a ni dawn a, March ni 13,2024 thleng awhin session hi ni 16 chhung neih a ni dawn a. Ruahman dan chuan February ni 27,2024 (Thawhlehni) ah Chief Minister in budget a pharh ang.

Assembly Speaker hova Bussiness Advisory Committee thukhawm chuan session hun hman dan tur hi an duang fel tawh a. Ruahman dan chuan session tan ni (Feb.19) hian Larsap in house ah thu a sawi ang a, Feb.20 chawlin Feb.21 (Nilaini) ah session kar laka member thi te sunna hun leh Larsap thusawia lawmthu sawina motion sawiho a ni ang. Thudawn danin tun tum session ah hian Minister hlui KL Lianchia bak sun tur an awm lo a ni.

February ni 27,2024 (Thawhlehni) ah Chief Minister leh Finance changtu ni bawk Lalduhoma chuan kum 2024-2025 budget leh kum 2023-24 a sawrkar sum indaihloh dilbelhna (supplementary demand) a pharh ang a. Budget hi Feb.28&29 ah te sawiho a ni ang. March ni 5,2024 (Thawhlehni) atangin Minister hrang hrang te kumthar sum hman tur te sawihova pass tum a ni ang.

Zirtawpni thleng khan session a chhan tur hian zawhna (starred question) 203, ziaka chhan chi zawhna (unstarred question) 29, paper lay tur 2 leh resolution 2 a lut tawh a. Sawrkar atangin bill 1 'The Mizoram Water Resources (Management and Regulation) bill, 2024 a lut tawh bawk.