ZALEN January 8, 2024 : January ni 3 atang an In atanga chhuak Lalbiakmawia kum 46, Hnahthial Electric veng chu vawiin khan thi-a hmuh a ni, a ruang hi posmortem a nih hnuah vawiin vek khan vuiliam nghal a ni.

Lalbiakmawia hi January ni 3 tlai dar 3:00 vel khan chemte leh hrui kengin an In atangin a chhuak a, a chhungte ngaih a tha lo hle a, thenrual thate nen an zawn ngial pawha an hmuh tak mai loh avangin Pathianni khan a chhungte hian Electric Branch YMA, Hnahthial hnenah an thlen a, Electric Branch YMA leh Electric North Branch YMA member te chuan vawiin khan zawn hnatlang an kova, an kawmthlang hla lutuk lo, km 1 pawh tling lovah thi a hmuh a ni ta a ni.

Hnahthial Police te pawh ruang hmuhnaah hian an thleng ve nghal a, thil tih tur tul tul an buaipui nghal niin a ruang hi Hnahthial Damdawi inah posmotem a nih hnuah vuiliam nghal a ni. Mibo zawn ngai an awm tih a hriatin South Tuipui bialtu MLA Jeje Lalpekhlua chuan mi bo zawngte thingpui inna atan cheng sang nga (Rs. 5,000) a hlan a ni.