India ramah hian darkar 24 liam ta chhungin hri leng avang hian a vawi khat nan mi 4,000 chuang an thi a. State eng emaw zatin hri leng danchah nan inkhuahkhirhna kalpui mah se rah a la chhuah lo.

Darkar 24 liam ta chhung hian mi 4,187 zetin Covid-19 hi an thihpui leh hman a, mi 238,270-in an thihpui ta.

Hetih chhung vek hian mi 4,01,078-in an kai tih hmuh chhuah niin mi maktaduai 21.9 dawnin an kai ta a, United States an la phak lo deuh.

Hriselna lama mi thiam tam tak chuan sorkarin thi zat a chhinchhiah hi an ringhlel a, May thla tawp hma chu a vanglai hi a la kal dawn niin an sawi a, ram puma inkhuahkhirhna kalpui a tul thu an sawi.

Ruang dahna leh inhalna hmun pawhin a dawl zo tawh lo va, park-ah leh lirthei hunaah inhalna an siamchawp nual tawh chungin an inchan hleithei lo.

Prime Minister Narendra Modi chu oxygen kham khawp awm lo avangin sawisel a hlawh mek a, sorkar erawh chuan a theihtawp a chhuah niin a insawi.

Tamil Nadu Chief Minister MK Stalin chuan Zirtawpni zan khan Modi hi lehkha thawnin chawlhkar hnih lo awm tur chhungin oxygen an dawn thin let pe turin a ngen.

Congress hruaitu, Rahul Gandhi chuan  Modi-a hi ram pum inkharkhip puang turin a ti a, India leh a thenawm ram thlengin chhiatnaah an lut dawn niin a sawi.