Aizawl: Nikum 2020 khan Mizoramah ruihhlo hmansual vanga thi mi 67 an awm a, hei hi kum 21 kalta chhunga Mizoramah ruihhlo hmansual vanga thi an tam ber kum a ni.

Mizoram Excise & Narcotics Department chhinchhiah danin nikum chhunga ruihhlo vanga thi hi mipa 61 leh hmeichhia 6 an ni a, an zinga mi 7 hi heroin vanga thi an ni a, midang 60 pawh hi heroin leh thildang tih pawlh te an ni. Kumin January ni 14 thleng khan Mizoramah damdawi hmansual vang hian mipa 2 an thi tawh bawk a ni.

Excise & Narcotics department thawktute chuan tunhnaia drugs vanga thi chu a ti thar ni lovin lo ti tawh thin, an dose an hriat loh vanga thi ta an ni tlangpui nia an hriat thu Zalen an hrilh a. "Lockdown vang khan damdawi hmuh tur a tlem a, drugs ti thin tam takin tih tur an nei lova. Tunhnaia lockdown thlahdul anih hnuah tlema damdawi hi pung lehin tunhma a ti thin tam tak ten ni danga an dose ang kha tih leh an tum a, hei hi an OD phah ta niin a lang," an ti bawk. Zalen thudawn danin Mizorama drugs ti thin ten ruihna atana an hman lar ber heroin man pawh tunlai hian a tlahniam leh deuh a, lockdown laia hawng khat Rs. 50,000/60,000 ni thin kha tunlai hi chuan kawng khat Rs. 35,000 te pawhin hmuh tur a awm niin an sawi.

Excise & Narcotics Department chhinchhiah danin kum 1998 atanga kum 2004 inkar chhung kha Mizoramah ruihhlo a hluar vanglai leh thihpui an tam hunlai a ni a. Ruihhlo hmansual vang hian kum 1998 ah mi 84, 1999 ah mi 89, 2000 ah 139, 2001 ah mi 101, 2002 ah 93 leh 2004 ah 143 te an thi a. Kum 2004 hi damdawi hmansual vanga thi chhinchhiah anih atanga thi an tam ber kum a ni.

Kum 2005 atangin drugs vanga thihna hi a tlahniam chho leh a, nikum 2020 hi drugs vanga thi an tam ber kum a ni leh ta a ni. Excise & Narcotics Department chhinchhiah danin kum 1984 atanga kumin January ni 14 thleng khan Mizoramah damdawi hman- sual vanga thi hi mi 1648 an awm tawh a, an zinga 1455 chu mipa niin hmeichhia 193 an awm bawk.

Mizoram Excise & Narcotics Department hian nikum chhung khan ruihhlo phurh nana hman two wheeler 32, three wheeler 8, LMV 62, MMV 3 leh HMV 5 an man a. Heroin kg 11.724, ganja kg 127, mathamphetamine kg 45.5 an man bawk. Nikum chhung vek khan ND&PS Act hnuaiah mihring 574, MLP Act hnuaiah mi 1448, ME Act hnuaiah mi 83 leh drugs and liquor law hnuaiah ramdang mi 16 an man bawk a ni.