India-a court chuan mipa pahnih, kum 2005-a hmeichhia leh naupang 19 zet thihna thleng avanga thi tura an chung thu lo rel tawhte chu thiam chantirin a chhuah zalen.

Surinder Koli-a leh a hnathawhna, Moninder Singh Pandher te hi ram pum deng chhuak thubuaiah hian kum 2009 khan thiam loh chantir an ni.

Delhi bula an chenna in bulah kum 2006 khan mihring taksa peng eng emaw zat chhar an nih hnuah man an ni.

Thawhtanni khan Allahabad High Court chuan Koli-a hi a laka thubuai siam 12-ah engmah inhnamhnawihna nei lo tiin a chhuah zalen.

Pandher-a pawh thubuai pahnih an siamsakah pawikhawihna nei lo tiin a chhuah a. Heng mi pahnihte hi hrem turin ‘finfiahna tha tawk a awm lo’ tih vangin chhuah an ni tih an aiawha ding dan hre mi chuan thuthar lakhawmtute hnenah a sawi a. Court thuremna kimchang erawh puan zar a ni lo.

Tualthahna hi kum 2006 khan hriat chhuah a ni a. Delhi daia veng hausa, Noida-a Pandher-a chenna in bawlhhlawh paihna hmuna mihring taksa peng leh naupang thawmhnaw hmuh atanga hriat chhuah a ni.

Hmeichhia la thalai tete 19 vel leh naupangte pawngsual, thah leh an taksa chan sawm an ni a. Police chuan hetih lai hian tual thahna hi Pandher-a ina thleng niin an puh a, inah hian Koli-a hi hna thawka awm a ni.

Police chuan naupangte ruang hi ipah dahin thuruk a ni tih an sawi a. Koli-a hian thah an nih theih nan chithlum leh chocolate-a thlemin a hruai lut thin niin an puh a. An chhui lai hian Koli-a hian heng naupangte lakah hian rawng taka che angin a insawi niin an sawi a; mahse, a inpuanna hi court-ah pha lehin an vuak nasat em avanga sawi ta mai chauh a nih thu a sawi.

India-a thil chhuitu lian ber, CBI chuan an pahnih lakah hian thubuai 19 zet a ziak lut a. Koli-a hi tualthah, mi ruk bo, pawngsual, finfiahna tichhiaa puh a nih laiin Pandher-a hi mihring ru bova puh a ni.

He tualthahna thleng hian India ram pum deng chhuakin mi tam tak chuan police-te chu inthlahdah tiin an puh a. Chanchinbute chuan pawikhawihna thlen dan chuan mi a barakhaih em avangin ‘house of horrors’ tiin an sawi bawk.

Tual chhung mi eng emaw zat chuan mi rethei tak tak chhungkua atangin bo report a awm a, police-in an chhui zui thuai lo niin an sawi a. Heng mi retheite hi Noida bul lawka mi rethei chenna veng (slum), Nithari an tiha chengte an ni a, hei vang hian a thubuai pawh ‘Nithari inthahna’ tia sawi a nih phah nghe nghe.