Greater Noida, Uttar Pradesh-a Twin Tower building tihchhiat chuan rampum titi a luah zel a, flat leitu ten an sum an hmu let ang em tih chu zawhna awm mek a ni. Hetih lai hian Supertech company chuan thuchhuah an siam a, flat leitute hi sum an pekkir tur thu leh, a pung nen an rul vek tur thu an sawi. 

Twin Tower building-ah hian flat 711 a awm a, chung zinga 652 te chu an tiral hman. Mahse kum kaw chhung zet an lo sak tawh hi Supreme Court chuan nikum August thla khan thiat turin thu a pe a ni. Thupek chhuah atanga thla thum chhunga thiah tur tih ni mah se harsatna eng eng emaw a awm avangin kum khat hnuah an thiat thei ta chauh a ni. 

He building satu Supertech company chuan flat leitute hi duhthlan tur pahnih an pe a, hei hi flat leitute chuan an pawm thu an sawi tawh. Company lam hian flat leitute chu an leina zat sum pekkir an tiam bakah a pung nen rulh an remti a, hei bakah hian a hlutna mil sum pek bakah a pung pek tel an inhuam bawk a ni. 

Twin Tower hi Pathianni chawhnu dar 2:30pm khan tihchhiat a ni a, bulding meter 100 chuang zeta sang tihchhiat nan hian explosive kg 3700 an hmang a, second 9 chhung lekin vaivutah a chang ta a ni. He building hi Delhi-a Qutab Minar ai pawhin a sang zawk a, India rama building tihchhiat tawhah chuan a la lian ber. A sak nan hian cheng vaibelchhe 100 vel an seng tawh a, flat leitute atangin pawisa cheng vaibelchhe 180 vel an hmu tawh thung. 

A building leh ram hlut zawng belhkhawm hi vaibelchhe 700-800 vel nia chhut a ni a, Noida-a building man to ber a ni. A building tihchhiat nan ringawt pawh hian vaibelchhe 17 vel an hmang a ni.