Aizawl; Tuirial Assembly constituency by-election chu November thla tawp lam emaw, January thla chawhnu lamah emaw neih a nih rin a ni a, Mizoram a Covid hrilen dan leh a bikin Tuirial bial chhung a Covid hrilen dan dinhmun chu Election Commission of India (ECI) ah thlen a ni tawh.

Mizoram election department hotute hnen atanga thudawn danin, ECI hnenah Tuirial Assembly constituency by-election neih hun atan November 2021 an rawt tawh a, hemi rual hian Mizoram a Covid hrileng dinhmun leh a bikin Kolasib district leh Tuirial bial chhunga hrileng dinhmun kimchang ECI ah thlen a ni a. Hrileng dinhmun a ziaawm loh chuan tun mai a inthlan neih chu hlauhthawnawm deuh a ngaih a nih thu te thlen a ni bawk.

Election department hotute sawi danin, State dangah by-election nei tur an awm ve nual a, kumthar lam a inthlanpui nei tur state dangte pawh an awm. Chungte nen inrualkhat deuh a inthlan hun an rawn bituk thei nia ngaih a ni.

ECI chu Covid hrileng chungchangah an fimkhur tih thudawnna chuan sawi bawkin, Mizoram a hrileng dinhmun a zirin, inthlan hun chu kumin November thla tawp lam emaw, January thla chawhnu lam emaw a nih a rinawm niin a sawi bawk.  

Tarlan tawh angin, Election department lam chu by-election nei turin an inbuatsaih tan tawh a Electronic Voting Machine (EVM) leh Voter Verifiable Paper Audit Trail (VVPAT) te pawh a tum khatna atan endik a ni tawh.