ZALEN April 1, 2025; A fanu mo kawr leh pheikhawk, silk la hmanga mawi taka phiartu, Romuanpuii Zadeng chuan, pasal nei tur, nu nei tawh lo ten an duh a nih phawt chuan tlawm takin an mo kawr tur a phiar sak thei tih ZALEN a hrilh.

ZALEN in a biakna-ah Romuanpuii Zadeng, Dinthar, Aizawl chuan March ni 27, 2025 a pasal nei a fanu, Esther Rohlupuii tan 'a tih theih tawk ropui ber,' ama kut chhuak ngei silk la hmangin mo kawr leh pheikhawk a phiar sak tih a sawi a, a buatsaih hun chhung atan ni 10 leh zan 10 vel a hman thu a sawi.

"Nu nei tawh lo, pasal nei tur ten an duh a nih phawt chuan ka theih tawp a tlawmin ka phiar sak thei," Romuanpuii Zadeng chuan ti bawkin, chu chu a rilrua awm lian tak a nih thu a sawi bawk.

A fanu tana mo kawr leh pheikhawk silk la hmanga a phiar sak hi social media lamah a lar hle a, mi tam takin ropui an tih thu te leh nu hmangaihna ropui zia pholangtu a nih thu tein an comment a ni.