ZALEN April 19, 2025 : Zoram Thar Zofate Lairelna Inpui chuan Nuai 10,000 senna tur Zofate Biak Inpui sa turin Thenzawla Kanan Phaipui veng-ah hma a la mek a, an pawl general secretary Mafeli Hlawndo chuan United States lamah hriattirna (awareness) leh hnatlang thawhlawm lakkhawmna (fundraising) nei turin a pa, an pawl president ni bawk Rev Dr Zaichhawna Hlawndo nen an kal dawn tih press mite hmaah a sawi.

Hnatlang thawhlawm khawn tur chungchang sawiin Mafeli Hlawndo chuan: "United States-a Zofa khawsate'n kan thiltum hi min tuipui hle a, biak in sak hnatlang thawhlawm khawn tura sawm kan ni a, thla ruk tal cham a, hmun 100 chuangah he hriattirna (awareness) hi sawi turin min beisei a ni," a ti.

Zoram Thar Zofate Lairelna Inpui general secretary chuan biak in sak hna tan a ni tawh tih a sawi a, tunhnaiah ban 50 phun tum a nih thu a sawi a, ban pakhat zel hi kohhran hming emaw, pawl em,aw, hnam peng hminga thawlawm thawh theih a ni tih a sawi.

He biak in - Zofate Biak Inpui sak hna hi kalpui tan a ni tawh a, Cheng Nuai 40 vel sen a ni tawh niin Lalruatfeli Hlawndo chuan a sawi. Biak in hi Thenzawl Kanan Phaipui ramah sak tan a ni tawh a, hnatlangin vawi engemawzah he pawl member leh anmahni tanpuitute chuan an thawk tawh a, leirawhchan pawh siam chawpin 50,000 chuang zet an dekchhuak tawh a ni.