Naupangte tana a pawimawhna

Naupang doctor, Dr. Malik chuan invenna pek hi naupangte tan a pawimawh hle tih a sawi.

“Naupangten vaccine an mamawh lo nia kan sawi thin hi a dik vek lo. A chhan chu naupangah hian multisystem inflammatory syndrome a insiam thei a, hei hi ICU-a enkawl ngei ngei ngai chi a ni a. He MIS-C syndrome hi naupangah chauh a awm thei a, a hri hi sawi lawk theih loh a ni. Tun lai naupangte chu an hriselin an harhvang angin kan hmu a; mahse, nakin zelah a ni dawn em kan hre lo. Hei bakah hian naupangte chuan an inah an nu leh pa leh pi leh pute hnenah an kai thei a, chu chuan chhiatna lian a thlen thei a. Tun thlengin naupangte hnenah vaccine kan la pe lo va, mahnia inven theihna tawk kan tih ang kha kan la thleng lo. Pek ngei hi a pawimawh em em a ni,” a ti.

“Naupangte hi vaccine kan pe ngei ngei tur a ni a, tuna anmahni puala buatsaiha enchhinna kalpui meka dawngtute hi hri leng beihnaa ral hmatawnga tangte an ni,” an ti bawk.

Dr. Maninder Dhaliwal, Associate Director, Medanta-a Paediatric Critical Care Unit chuan, “Nu leh pate hian ngaihngam taka an fate sikul an kaitir theih nan an tan vaccine awm theih hun tur hi an zawt chamchi a. Nu leh pate hi chu an fate hnena vaccine pe turin an inpeih thlap tawh niin ka ngai a, pek thuai hi a pawimawh em em reng a ni. India hian pek ngei tumin hma a la mek a, puitling a pek pawh chak thei ang berin a kalpui a ni,” a ti.

Inrinnia Hnam Pa, Mahatma Gandhi piancham, Gandhi Jayanti-a Delhi-a India Today Healthgiri Awards 2021 sem chhuahnaah Dr. Ravi Malik, Paediatrician, Radix Healthcare chuan tun thle atang hian naupang kum 12 chung lam chuan Covid-19 laka invenna an la tan dawn tih a sawi.

“India rama cheng  40% hi kum 18 hnuai lam an ni a, mi vaibelchhe 48 chuang tihna a ni. October-ah hian Zydus Cadila-in an siam vaccine chu naupang kum 12 chung lam tan pek theih a nih a rinawm,” a ti.

Dr. Malik chuan, “He vaccine hi inchiu dan pangngaia pek chi a ni dawn lo va, intradermal vaccine niin vuna dah chi a ni a. Rang taka kah luh tur a ni a, inchiu pangngai ang kha a ni lo,” a ti.

Naupangten an lak tur damdawi hi vawi thum lak ngai chi a ni dawn thung a, dose inkarah hian ni 28 a tlak a ngai dawn tih a sawi bawk.

Naupang an tam a, la kim vek tur chuan hun a duh rei dawn tih a sawi bawk.