ZALEN July 26, 2024: Tlabunga zirlaite, hna zawng mek ṭhalaite bakah lehkhabu ngainatu apiangte mamawh chu Tlabung SDO (C) Moses Lalfakawma Tlau-in an ban phakah a chhawpsak a, lehkhabu dahkhâwmna, Tlabung Robâwm tia a vuah chu a hûnsak.

Lehkhabu hmanga khawtlang boruak a ṭha zawnga chawh thawh tumin SDO (C) hian Tlabung Robâwm hi a hûng a, heng lehkhabu belhchian dâwl tak lei nan hian sum tam tak a sêng.

A bul ṭan nan, Tlabung khaw chhung hmun hnih - Bazar Bungkawn leh damdawi in kawta Tlabung Robâwm a hûnah hian lehkhabu 30 bawr vel ve ve a dah a, hriatna tipung leh ngaihtuahna tizau thei a tam ber.

Heng lehkhabu hi a duh apiang tan a thlâwna hawh chhuah theih a ni dawn a, hawh theih hunchhung bithliah ni lo mah se, chhiar zawh erawh chuan dah kîr leh tur a ni thung.

Tlabung Robâwma dah atan a duh apiang tan lehkhabu hlan (donate) ve theih a ni ang.