Aizawl : Vairengte-a truck driver pakhat kutthlak avanga Mizoram lut tur truck te Lailapur leh Bagha-a dan chah a ni h hnuah, India hmarchhak hmun hrang hranga CAB vanga buaina thleng avangin Mizoram, a bikin Aizawlah petrol leh diesel lak tumin petrol pump/ filling station lamah thui tak tak intlar a ni a, petrol zawng leh diesel la turin hun kan seng nasa hlawm hle. Chutih rualin filling station kan biakpawh theih te chuan oil lamah hian buaina an nei rih hran lo niin ZALEN an hrilh.
Filling station zing ah petrol/diesel nei lo chu an awm a; mahse, hengho pawh hian rawn thleng tur beisei an nei hlawm. Pump lun zual deuh ZALEN-in a biakpawh te chuan petrol leh diesel an nei vek a, Aizawl-a petrol pump lun bera chhal theih Mizofed hian he thu buatsaih lai hi chuan diesel bik hi coupon bakin an pe chhuak rih lo a, petrol leh Extra- Premium (XP) te erawh an free-sale a, bur a lak erawh an phal lo a, petrol hi unload tur an la nei bawk a ni.
Lalnghakliana, Lalruatkima, Zangena, Lalbiakliana leh Singson Filling Station te chuan nimin thleng khan petrol leh diesel an nei vek a, stock an neih that rih mai bakah thleng tur an nei vek bawk a, Lalnghakliana Filling Station, Ngaizel phei chuan vawiin pawh hian an tih dan thin angin chhun dar 12 atanga tlai lam dar 4 thleng an pump hi an hawng dawn a, chutiang bawkin Mizofed pawh hian an pump hi an hawng dawn bawk.
Tunah hian filling station zingah stock nei lo pawh an awm tho a, amaherawh chu heng ho te pawh hian thleng tur beisei an nei vek thung. ZALEN-in filling station a biak atanga a lan dan chuan heng petrol leh diesel te neih loh chhan ber ni a lang chu, mi tam takin invenna lam ngaihtuah avanga an mamawh bak an chhek khawl vang niin a ngaih theih.
“Taxi khalh nitina an mamawh chin rawn la mai thinho angte pawn an lak thin let aia tam an la a, bur ten an rawn dawh tel zel. Tin, kan pump rawn dawr ngai lem lo bura rawn la an tam avangin ni danga kan inhralh dan nen a inmil tak loh avangin kan chatlak phah a ni,” tiin pump nghaktu pakhat kan biakpawh chuan a sawi.
Food Civil Supply & Consumer Affairs Department lam chuan Filling Station te hi motor azira an pek chhuah tur a bituk a; mahse, tun dinhmunah filling station-te hian an zawm vek lem lo niin a lang a, an dawrtu te duh zat zat an laktir mai a; mahse, bura duh tawk tawk lak ang chi hi chu an phal lo vek. Mahse, filling station ten coupon an pek chhuah neite erawh chu bur pawha pek an ni tho a ni.