Aizawl June 8, 2024 : Olympics 2036 a Mizo infiammi tam thei ang ber an tel theihna atana hmalakna hmasa atan June ni 13-14, 2024 hian Baptist Centre, Falkland, Aizawl-ah Mizoram Sports Conclave neih a ni dawn.

Vawiin hian Sports & Youth Services Minister Lalnghinglova Hmar chuan a pisa-ah chanchinbumite kawmin conclave hi National level sports intawhkhawmna, Olympics 2036 a Mizo infiammi tam thei ang berin Olympic medal an awrh theihna tura inbuatsaihna hmasa a ni tih a sawi a. "India ram state zingah Mizoram hi Olympics 2036 vision nei a National level Sports Conclave buatsaih hmasa ber kan ni," a ti.

Sport Minister chuan conclave ah hian hmarchhak biala state pathum Sport Minister bakah sawrkar laipuia mi pawimawhte, Tata Trusts, Reliance Foundation Sports, Tata Steel leh Inspire Institute of Sports-a an hotute, India ram chhung leh pawna prominent sportsperson leh journalist te, Olympic sports discipline a Indian Federation/Association hruaitu te, Mizo in Olympian kan neih C. Lalremsanga leh Lalremsiami te bakah Mizo infiammi hlawhtling dangte pawh an tel dawn tih a sawi a. Conclave neihna atan hian Scheme of Human Resources Development in Sports (HRDS) chuan Rs. 68,80,500/- an pe niin a sawi bawk.

Mizoram Sports Conclave pual hian website https://mizoramsportsconclave.com siam a ni. Hemi kaltlang hian Conclave a tel turte in register theih a ni.