Omicron: India-ah pathum

Admin - Dec 04, 2021

India-a he hri kai pathumna a ni

Zimbabwe atanga Gujarat-a thlawk haw chu Jamnagar-ah tun laia Covid-19 hri hmuh chhuah thar, Omicron a kai tih hmuh chhuah a nih thu an state health department chuan a sawi a. India-a he hri kai pathumna a ni.

Jamnagar-a cheng, kum 72 mi niin Ningania COVID-19 a kai tih hriat a nih hnuah genome sequencing turin sample thawn a ni a, variant thar hi a kai tih hriat a ni ta tih health department thupuan chu news agency PTI-in a tar lang.

A awmna bul hnai chu micro-containment zone-a puan nghal niin thuneituten a hnuhma an chhui zui nghal. 

“Kan dah hrang a, a dinhmun kan thlithlai reng a. A chenna chu micro containment zone-ah puan a ni a, hnuhma chhui leh endik hna kalpui zel a ni,” tiin Manoj Aggarwal, Additional Chief Secretary, Health & Family Welfare Department, Gujarat chuan news agency ANI a hrilh.

India-ah hian a hmain Bengaluru-a mi kum 46 mi, vaccine pawh la kim tawh, ram chhung chhuahsan lo leh South African kum 66 mi, hri kai lo tih finfiahna nei chunga India-a lut chuan Omicron hi an kai tih hmuh chhuah a lo ni tawh.

South Africa-a hmuh chhuah hmasak ber, Omicron variant avang hian India chuan ram dang atanga luhna thlawhna tumhmunah thleng tharte endik leh an thlen chin chhui hna ngawrh takin a kalpui.

World Health Organisation (WHO) chuan Omicron hi a dangte aia inkai awl leh thawk na zawk a ni em tih hre chiang turin zir chianna hun a la ngai dawn tih a sawi a. Khawvelin vaccine a neih tawhten a dang thei em tih pawh hriat a la ni chiah lo.

Tun dinhmunah chuan variant thar hian dam lam tan mek khawvelah damlohna a thlen thar leh rinna a lian hle a. India bakah ram 30 chuangah kai an awm tawh.

Union health ministry chuan Zirtawpni khan Omicron variant hian India-ah chuan invenna pek that a nih avang leh Delta variant avanga miin ngaia natna an neih tawh avangin a thawk na vak lo thei tih a sawi.

India-ah hian puitling maktaduai 944 velin invenna an la tawh a. Heng zinga 84% chu dose khatna la tawh niin mi maktaduai 125 chuang vel, invenna la la ve lote chu Omicron lo thleng tur avangin la thuai thuai turin sorkarin a nawr mek.

Share now