ZALEN May 11, 2025: Sawrkar hmasa, MNF ministry hnuaia hmalakna, traffic jam sutkianna tura siam, Parking House Support Scheme (PAHOSS) chu sawrkar tharah chhunzawm a ni tawh dawn lo va. He scheme atana sum sen ral hman zat Rs. Nuai 1,136.4 a tling.

PAHOSS hi kum 2019-a bul tan niin ruahman danah chuan Aizawl khawpui, AMC area chhunga traffic jam tiziaawm tura hmalakna a ni a. A dawngtute chuan an in sak sa emaw, sak lai mek leh la sak turte emaw chu man chawia vantlang motor park-na atan an buatsaih tur a ni.

PAHOSS hnuaiah mi mal emaw, pawl angin emaw, motor park theihna hmun siam thei (a tlem berah LMV panga tal park theih) hnenah sawrkarin tanpuina, motor pakhat zel park-na hmun ruahman turin Rs 1,00,000 tanpuina pek theih a ni a. Tanpuina dawngtute hian a tlem berah kum 10 chhung tal public parking atan an hmang ngei tur a ni.

PAHOSS atan hian Mizoram sawrkarin kum 2018-19 budget-ah Rs. Nuai 1,000 a dah a, kum 2019-2020 budget-ah Rs. Nuai 6,000 a dah leh bawk a. Hetihlai hian Covid leng vanga sum harsatna vangin hmalakna erawh a chak thei ta lo nia thudawn a ni.

ZALEN thudawn danin February 6, 2019-a khatih laia chief minister, Zoramthanga’n a hawn, PAHOSS hi sawrkar thar, ZPM sawrkar hnuaiah chhunzawm a ni tawh dawn lo va. A bul tan a nih atanga sum sen ral zawng zawng zat chu Rs. Nuai 1,136.4 a tling a. PAHOSS hnuaiah hian tha taka hma la an awm laiin hma la tha tawk lo pawh an awm nia thudawn a ni bawk.