Chak zawk nih inchuhna - Panjshir ruamah hian indona nasa tak a thlen mek avangin an dinhmun dik tak hriat a harsa hle a, lehlam lehlam hi dinhmun tha zawkah an inchhal ve ve.

NRF thupuangtu, Ali Nazari chuan BBC World News hnenah Taliban helho hi thui tak an um let niin a sawi a. “Za chuang zet chu an tangkhang a, hmanrua leh silaimu pawh an nei tawh lo va, an inpekna turin inbiakna kalpui mek a ni,” a ti.

Taliban thuneitute pawhin hnehna an chan thu an puang ve mek bawk a. An commander pakhat chuan Reuters news agency hnenah, “Allah Almighty khawngaihna azarah Afghanistan pum kan thunun ta a. Buaina siam mektute chu kan hneh a, Panjshir pawh tunah chuan kan thuhnuaiah a awm tawh,” a ti.

Afghanistan-a Taliban-in an la thunun ve loh awm chhun, Panjshir Valley chu lak ngei tumin an bei chhunzawm zel a, tun hma atanga anmahni dotu, National Resistance Force nen an inkap nasa hle.

Taliban chuan ram zau tak an la tawh niin Reuters news agency  hnenah an sawi a; mahse, lehlam pawl hian hei hi an pha.

Resistance hruaitu pakhat, Amrullah Saleh chuan tlanchhia anga an sawina chu a pha a, an dinhmun erawh a khirh hle tih a sawi.

Panjshir ruama indonaah hian mi za chuang an thi tawh nia sawi a ni bawk.

Kabul leh khawpui hrang hrangah Taliban hian hnehna an chan lawm nana silai an hmeh puahah mi eng emaw zat an thi bawk nia sawi a ni.

Panjshir Valley hi Kabul hmar lam hreta awm, Afghanistan-a province te ber niin Taliban-in an la thunun loh awm chhun a ni.

Tun hma atang tawha Taliban dotute awm khawmna hmunah hian mi 1,50,000 atanga 2,00,000 vel an cheng a. Tlangram khawkrawk tak niin indona avangin mi tam tak an biru.

Resistance force an tihte hi Afghan sipai hlui leh tual chhunga sipai pawl an ni a, tribal hruaitu, Ahmad Massoud-a kaihhruai an ni a. A pa hi kum 1980 chhova Soviet lo tudawltu niin kum 1990 chhova Taliban um lettu a ni bawk.

BBC hnena video message a thawnah Afghanistan vice president hlui, Saleh chuan lehlam lehlamah thi an awm teuh tih a sawi.

“Dinhmun khirh takah kan awm a, Taliban-ten min rawn rûn a ni,” a ti.

“Kan inpe dawn lo va, Afghanistan tan kan ding zel dawn,” a ti.

Video a siam chhan hi mi thenkhatin an ram a chhuahsan anga an sawi a dik lohzia tihlanna a nih thu a sawi bawk a. A awmna hmun tak erawh hriat mai theih a ni chuang lo.