Indian parliament-ah inhnialna boruak sang tak chuan nghawng nei zelin Thawhlehni khan eptu MP 49 zet suspend leh an ni a, MP 141 zet hrem an ni ta.

Heng MP-te hi kar hmasaa miin parliament inkhawm tibuaia an luhchilhna chungchang sawiho phutna avanga hrem an ni.

Thawhtanniah khan eptute hian ni khata MP 78 zet suspend an nih hnuah Prime Minister Narendra Modi-a sorkar chu mipui rorelna beiah an puh.

MP hrem zinga a tam zawk hi thlasik thutkhawm neih mek, tun Zirtawpnia tawp tur thleng atana hrem an ni.

Mi 24 vel erawh privileges committee thu angin an chet dan avangin hun rei zawk atan hrem an ni.

MP hram tam zawk hi party tanhona, INDIA-a telte an ni hlawm a. Anni hi nakum inthlanpuia Modi-a kaihhruai BJP sorkar paih thlak tuma eptu hrang hrang tang rualte an ni.

Tangho hian member 543 awmna rorelna in hniam zawk, Lok Sabha-ah MP 142 an nei a, heng zinga 95 zet hi suspend an nei a. Rorelna in sang zawk, Rajya Sabha-a member 250 awm theihnaah 101 neiin 46 suspend an ni bawk.

“Vanduaithlak takin parliament-a mipui rorelna thlahna kan ziah tan a ngai ta a ni,” tiin an suspend hnuah Congress MP Shashi Tharoor chuan a sawi.

Rorel lai, BJP hian eptu hruaitute hian parliament kaltluang tur tihbuai hrim hrim an tum zawk niin an puh let.

Eptute leh Modi-a sorkar inkar hi a chhiat deuh deuh zel leh boruak pawh a san belh zel rin a ni.

Eptu MP-te hian kar hmasaa rorel inkhawm neih laia mi pahnih luta au chunga boruak rawng nei phuh chhuah leh pawna mi dang pahnih hetiang bawka chetna thleng chungchangah hi parliament-ah Union Home Minister Amit Shah emaw, Modi-a’n thu nei se tih an phut.

Heng thil thlengah hian mi paruk man an ni tawh a, police chuan mi pali chu dan khauh tak hmangin thubuai an siamsak tawh.

Police hian hetianga an chet chhan hi engmah an la sawi lo va; mahse, tual chhung chanchinbu leh an mi man chhungte chuan hetianga chete hi hna nei lo an nih thu leh sorkar kal dana an lungawi lohna an lantir niin an sawi.

Parliament luhchilh hi parliament beih kum 22-na champhaah chiah thleng a ni.

Eptu MP-te hian venhimnaa chet phelhna thleng hi parliament-ah sawiho ngei an phut tlat a ni.

Modi-a hian he thil thleng hi parliament-ah a la sawi ri miah lo va, Hindi chanchinbu pakhat hnenah erawh ‘thil serious tak a ni’ tih erawh a sawi.

“Sawiho tulna a awm lo va, a kimchanga chhui mek a ni,” tiin Dainik Jagran chanchinbu hnenah a sawi.

Shah-a pawh parliament-ah hian engmah a la sawi lo va; mahse, high-level enquiry ti tur erawh chuan thupek a chhuah a, eptuten venhimna chetsualna thleng palh chu politics khelh nana hman tumah a puh ve thung.

“Prime minister hi chanchinbu miten an kawm thei a, home minister pawhin TV channel-te a kawm thei,” tiin eptu, Congress party president Mallikarjun Kharge chuan a sawi a. “Mahse, India mipuite aiawhtute awmna parliament-ah erawh engmah an ti si lo,” a ti a. Kharge-a hi Rajya Sabha member a ni a, suspend a ni ve rih lo.

Rashtriya Janata Dal MP Manoj Kumar Jha pawhin hremna chu ‘chawimawina tar lanna’ a nih thu a sawi.

Eptu MP thenkhat, Kharge pawh telin, sorkar hian bill pawimawh tak takte sawiho lova pass a nih theih nan eptute hi a hrem niin a sawi.

Union Minister Piyush Goyal chuan Thawhtanni khan rorelna in sang zawkah MP 34 zet hrem tura tihna motion a pu lut a, parliament rorel tikhaihlakin bill pawimawh an dan chah dah chu ‘ruahman lawk’ niin a puh.

Eptu MP-te hian parliament an zah lo va, Lok Sabha speaker leh Rajya Sabha chairman pawh zah lovin lungawi lohna tihlang lo tura an tihna pawh an ngai pawimawh duh lo niin a sawi.