India-a police-te chuan tun hnaia parliament luhchilhnaa ‘mawhphurtu ber’ tia chanchinbuten an sawi chu an man ta.

Lalit Jha-a hi zirtirtu niin India khawpui, Delhi-ah a inpe a. Court-ah erawh hruai a la ni lo.

Nilaini khan mi dang pali man an lo ni tawh a, dan khauh tak, anti-terror law an tih hmanga thubuai siamsak an ni.

Court-ah hruai an ni a, chawlhkar khat chhung police kuta awm tura tih phawt an ni.

Nilainia parliament luhchilhna thleng khan India-ah chuan chanchin thar lian ber a tling a. Kum 22 liam taa helhovin parliament an beih champhaah chiah a ni a, a hma lawkin Prime Minister Narendra Modi leh hruaitu dangten beihna hmasa zawka thite zahna an hlan nghe nghe.

Mipa pahnih, Manoranjan D leh Sagar Sharma ten MP-te thukhawm lai chu luhchilhin an au va, meikhu an phuh chhuak bawk a. Mi dang pahnih - Neelam-i leh Amol Shinde te chu parliament pawna auva meikhu rawng nei an phuh chhuah avangin man an ni bawk.

Heng mi palite hi kum 20 leh 30 inkar bawr vel an ni a, police hnenah hna nei lo an ni a, sorkar policy an duh khawp lo em em an ni hlawm niin an insawi niin tual chhung chanchinbute chuan an tar lang hlawm.

Police hian mi palite hi eng political party nen mah inzawmna an neih an la sawi lo.

Chanchin thar thenkhat chuan Jha-a hi venhim hna thawktute an paltlang theih nana ‘a thluak bur ber’ niin an sawi a. An paltlang hnuah erawh eng thu leh hla mah a la nei lo.

Times of India chanchinbu chuan a inpeknaah hian mipa pakhatin a kalpui a, a kalpuitu pawh hren zui ve a ni.

Nilainiah khan mi pali man nghal ni mah se Additional Public Prosecutor Atul Srivastava chuan Delhi court hnenah an chet dan chu ‘ruahmanna tha tak hnuaia kalpui’ a nih thu a sawi.

Parliament luhchilhna hi Ningani khan ram rorelna inah pawh sawi a hlawh hle a, eptu MP 14 zet chu suspend an nih phah a. Thil thleng chu sawiho leh Modi leh Home Minister Amit Shah ten thu an neih ngei an phut a ni.

Parliament chhunga luh phalna lehkhaa hming ziahtu, BJP MP Pratap Simha laka action lak an phut bawk.

Simha emaw, an party emaw hian engmah sawi an la nei lo va. Mi man tawh zinga pakhat, Manoranjan-a hi Simha-a biala mi a ni.