Parliament thleng kawng zawh tur la thulh lo

Admin - Nov 21, 2021

Pathiannia an thutkhawmah an sawi chiang ang

Lo neitu pawl hruaitute chuan parliament thlasik session neih chhunga ni tin tractor hmanga parliament pana kawng zawh tura ruahmanna an lo neih tawh chu an la thulh chuang lo tih an sawi.

Ruahmanna an neih hi Inrinni thleng kha chuan tihdanglam a la awm lo tih an sawi a. An kal zel dan tur erawh Pathiannia an thutkhawmah an sawi chiang ang.

“Parliament thleng kawng kan zawh tur chu a ngaiin a la kal reng a. Thutlukna tawp erawh Pathiannia Singhu border-a farm law duh lohna MSP chungchanga kan phutna hi SKM-in a rel ang,” tiin Samyukt Kisan Morcha (SKM) core committee member Darshan Pal chuan a sawi niin news agency PTI chuan a tar lang.

SKM hi lo neitu pawl hrang hrang telna niin farm law duh lohna lantir nan hian November 29-a tan tur, parliament thlasik thutkhawm hunah ni tin lo neitu 500 rualin tractor hmangin parliament thleng kawng an zawh dawn tih an lo sawi tawh.

An duh loh ber, farm law pathumte chu Zirtawpni khan Prime Minister Narendra Modi chuan sorkarin a hnuk kir tih a puang tawh a; mahse, lo neitute hian Delhi ramria dan duh lohna an lantirna hmun an la chhuahsan hlawm lo.

SKM hian sorkar thutlukna chu an lawm thu an sawi a; mahse, parliament-a hnuh kirna pass a nih hma chuan pun khawm hi sut rih an la tum lo tih an lo sawi tawh.

Share now