Aizawl January 5, 2024 : Vawiin chawhma khan Excise & Narcotics Minister Lalnghinglova Hmar hovin Excise & Narcotics Department chuan Commissionerate of Excise & Narcotics Building Conference Hall-ah Department thawktute chuan Kumthar Inhlantharna an nei. Khuallian chuan Pathian ring chunga an thawh chuan ram tan thlamuanawm department an nih zel tur thu a sawi.

Kumthar Inhlantharna inkhawm hi Peter Zohmingthanga, Joint Commissioner of Excise & Narcotics chuan a kaihruai a. Z. Lalhmangaiha, Commissioner of Excise & Narcotics chuan Welcome & Introductory Speech neiin, Excise & Narcotics Minister Lalnghinglova Hmar chuan hnathawktute fuihna thu sawiin Pathian hnena inhlanna hun a hmang.

Lalnghinglova Hmar chuan thawktute chu fuihin, “Excise & Narcotics Department-a thawktute hi Mizoram mipuiten zu leh ruihhlo dona kawnga an rin ber kan nih angin rintlaka kan thawh a pawimawh. Dan angin kan thawk ang a, Dan hnuaiah kan thawk bawk ang. Thawktu lak belh leh tul dangah hmasawn chu kan tum zel ang. Chutih rualin kan neihsaah lungawiin inrintawkna nen kan thawk ang a, hma kan sawn zel ang. Engkimah Pathian ring chunga kan thawh chuan kan ram tan thlamuanawm department kan ni zel ang” tiin a sawi.