ZALEN May 16, 2025 : MNF Sub Hqrs Lunglei President Vanlalhmuaka chuan Greater Mizoram inmun chhoh mekah Zoramthanga tluk a India leh thenawm ramte hmin thei hruaitu dang Mizoramin a nei rih lo a, a hovin hun remchang hmasa berah MNF hi a tungding leh dawn a ti.

MNF President Zoramthanga zuia zin Vanlalhmuaka chuan Mizo Hnam Run Lunglei-ah zin report pe pahin thu a sawi. Vanlalhmuaka chuan, "Kaladan Multi-modal Road, Indo-Myanmar ramri Zoram chhung khua Zorinpui leh Myanmar ram chhung engemaw chena thui an tlawh chungchang tarlangin, Kaladan Multi-modal Road kawng pawimawh tak hi Mizo mipui te leh NE. India tan malsawmna nasa zawk thlentu tur a la nih avangin he lam kawng hi a tlang chak a ngai ta tih India sawrkar hian a hrechiang ta hle mai a. Hmasawnna hna chak tak a kalpui a nih theih nan Pu Zoramthanga leh MNF kan pawimawh zia India sawrkar hian a hrechhuak thar zel a ni."

"Hetiang a nih tak avangin Pu Zoramthanga hian hmasialin kawng a lo sah kuak a tul ta a ni. Hei hi Pathian ruat lawk niin kan Zawlneite pawhin hmakhawsang atangin an lo aupui tawh a ni. Greater Mizoram inmun chhoh mekah Pu Zoramthanga tluk a India leh thenawm ramte hmin thei hruaitu dang Mizoramin kan la neih rih loh avangin India sawrkar chuan Pu Rama chungah nasa takin rinna an nghat a. Pathianin Pu Rama hovin hun remchang hmasa berah MNF hi min tungding leh dawn a ni," a ti.

MNF Sub Hqrs Lunglei President chuan MNF President Zoramthanga Leadership a nghin loh zia tarlangin, "Kan president hova thuneihna changa ram mipuite rorelsaktu kan nih leh thuai theih nan. MNF thawhlehna turah chhimlam District pahnih ni thin - Lunglei, Siaha, Lawngtlai, Hnahthial leh Chawngte-a Hnam Run lawi thinte inpumkhat a lungrual tak a ke an pen ho a pawimawh," a ti.

"Mizo Hnam Run Lunglei ruahmanna hnuaiah heng Hnam Run a hruaitute tan hun remchang hmasaberah inhmuhkhawmna nei tur a ruahmanna a neih thu tarlangin kan inpumkhat a kan inlungrual chuan Zoram pumah MNF hmasawnna thlentu kan ni dawn a ni," a ti bawk.