ZALEN September 17, 2023 : Bairabi North YMA President H.Kaphmingthanga chuan Pathiannia rel thlen leh bungraw hlan thlak an khap lo tih a sawi a, Pathianni-ah hian thleng lo thei se an duh tih erawh a sawi.

ZALEN-in a biaknaah Bairabi North YMA President chuan tun hnaia chanchinthara lo lang, Bairabi North YMA-ten Pathiannia rel atanga bungraw hlan thlak an remti lo nia sawi chu thu dik lo a ni tih sawiin, “Manipur chhawmdawlna thil leh khuarel chhiatna lam phurte chu Pathianniah pawh an lo thlenin engmah harsatna kan siam ngai lo a. Mahse hetih karah hian sumdawng thenkhatten hei hi remchanga lain an bungrua an phurhtir thin a, Pathianni pawh sawi lova hnathawh a ngaih thin avangin pumpelh nise kan duh vang zawk a ni,” a ti. 

Pathianni-ah chuan hnathawh loh theih nise an duh tih sawi bawkin H. Kaphmingthanga chuan, “Pathianni hi Kristiante ni serh a nih avangin hemi ni hi chuan rel lo thleng lo thei se kan duh a. Rel a lo thlen chuan hnathawh loh theih a ni lo a, Pathiannia a lo thlen loh hi labour association duh dan pawh a ni,” a ti bawk. 

Food Corporation of India hotute chuan tun hnaia chanchinbumite an kawmnaah Pathiannia rel a lo thlenin Bairabi North YMA-ten hlan thlak an phal lo a, hei vang hian cheng tam tak an chawi a ngai thin nia sawiin Pathiannia rel thlen chu an duh dan a nih bik loh thu leh an thuneihna piah lam railways thuneihna a nih avangin Pathiannia rel a thlen tum pawhin harsatna awm lo thei se an duh tih chanchinbumite hnenah an sawi a ni.