ZALEN April 8, 2025 : Aizawl District Legal Services Authority (ADLSA) chuan vawiin khan Aizawl Aizawl District Court-a District Judge Meeting Room-ah pawi khawihna tuartu mi 3 hnenah zangnadawmna an hlan a, March 21, 2025 khan mi 14 hnenah zangnadawmna hi a lo semchhuak tawh bawk a ni.

Crime Victim Compensation semna inkhawm hi Aizawl District & Sessions Judge Helen Dawngliani, ADLSA Chairman hoa hman a ni a; Mizoram BAR Association ten an tel pui bawk a ni. Mi kut tawrh avanga thi leh kumtling lo pawngsual tawk mi 3 hnenah zangnadawmna Rs 4,50,000 semchhuah a ni a, an zingah Aizawl Hospital Doctor, vanduaithlak taka mi kut tuar avanga boral Dr. Laltanpuia, Kulikawn, Aizawl a nupuiin a thah fate pawh an tel.

ADLSA Chairman, Helen Dawngliani chuan, "Mi pawikhawihna avanga hetiang hun man a ngai thin hi a pawi tak zet,” a ti a. Tualthatnate leh pawngsualnate hi mimal chunga thleng ni mah se, sawrkar pawi khawihna a nih thu a sawi bawk. "Kan sum dawn hi chhungkua emaw, mimal kan dam khaw chhuah nan, nunphung pangngai kan zawh leh theih nan tangkai taka kan hman hi kan tih tur a ni," tiin, chu chu sawrkar pawhin a phut a nih thu a sawi. Mizoram BAR Association leh pawi khawihna tuartu chhungte atangin thusawi tawi ngaihthlak a ni.

Zangnadawmna semna hunah hian Chief Judicial Magistrate Lalrochami Ralte, ADLSA Secretary-in zangna dawmna pek dan kalphung leh zangnadawmna dawng thei nia in hria-te chuan Aizawl District Legal Services Authority, District Court Building, Room 419 ah engtik lai pawhin zawhfiah theih reng anih thu a sawi bawk.