ZALEN, May 17, 2025: Pawl 10 leh 12 zir zo chiah leh pawl kua zir tan turten an zir zawm dan tur inkawhhmuhna leh fuihtharna atan Inrinni khan Electric Veng Branch YMA, Aizawl chuan Career Fair an buatsaih a, tum thum an buatsaihna a ni.

Electric Veng YMA Literature & Education Sub-Committee hian kum 2023 & 2024 khan hetiang hi an lo buatsaih tawh a. YMA kumpuan, ‘Ram leh hnam humhalh’ tihhlawhtlinna kawng khat atan zirna uar leh lehkha zir dan dik zawk inkawhhmuh a ngaih pawimawh vanga buatsaih an ni. 

Fair-ah hian subject hrang hrang - arts, science, commerce, management/banking, hospitality/ tourism leh law-a kal zelna tur inkawhhmuhna a awm bakah sipai, sports, medical, engineering-a tui mite tan stall buatsaih a ni.

Stall-ah hian hetiang lama hlawhtlinna nei tawh an veng mite rawn theihin an awm a. Heng bakah hian ITI, ICFAI University, Medhavi Foundation, Women's Polytechnic te an inpho bawk.

An veng chhunga zirna inte pawh an tel a, sikul naupang mahnia kal bakah nu leh paten an hruai thahnem tak an awm bawk.

Fair hi zirlaiten an zir zelnaa kawng dik zawk leh ngaihtuahna fing an neih theihna atan leh an ei zawnna kawnga hlawhtlinna an neih theih nana an huaihawt a ni a. Champhai South Bialtu MLA Lt. Col. Clement Lalhmingthanga’n a hawng.

Electric Veng YMA Hall-a hun hmanah hian Dr. R. Zothanliana, Associate Professor, Mizoram University leh Lalrinzuali, MPS ten zirlaite tana pawimawh leh an mamawh thu an sawi bawk.