Aizawl July 18, 2023 : PC Party Southern Hqrs. Lunglei chuan an minister hlui Lalhmingthanga (L) fanu, Meriam L. Hrangchal-i'n Congress Party Campaign-a PC Party mi leh sa te ram siamtha tura Congress party a lut tura sawmna a siam thin chu hriatthiam har an ti a, an party mi leh sa te lo sawm tawh lo turin an ngen.

PC Party chuan, "Meriam L. Hrangchal hian PC Party policy hi tihhlawhtlin duh tak tak nise chuan Congress Party-ah lut lovin PC Party ah a luh ngei kan ring a, mahse hetianga Congress Party-a awm chunga PC Party Policy te tih hlawhtlin a tum hi ropui kan ti a, ti hlawhtling ngei se kan duh. Mah se, PC Party Policy te ti hlawhtling tur chuan he policy duang tu ngei PC Party bakin a tihhlawhtlin theih kan ringlo. Congress Party kaihhruai Zoram-ah sawrkarna an lo chang tawh a, duh nise tihhlawhtlinna hun tha nei tawh in PC Party Southern Hqrs Lunglei te chuan kan ngai a, chuti chunga Zoram dinhmun vawiin ni thleng kan thlir chuan an tum tak tak lo tih a lang chiang hle bawk in kan hria a ni," an ti.

PC Party chuan, "Meriam L. Hrangchal-i'n PC Party mipui Zoram hmun hrang hranga awm te PC Party policy tihhlawhtlinna tura Congress party zawm tura a sawm fo mai hi lemchan na mai a ni tih kan hria a, tun hnuah PC Party mi leh sa te hetiang zawng hian sawm tawh lo tur in kan ngen a ni," an ti.

PC Party chuan, Meriam L. Hrangchal pawh hian zoram siam that duh vang a politics luh chilh i nih tak tak chuan Party Politics tuinu hi lo dût ve lo hram tur in an ngen tih an sawi bawk.