Aizawl June 25, 2023 : Aizawl khawpui chhung traffic management fel fai zawk a kalpui a nih theihna tura duan Rs. 61,03,120 senna, pelican crossing system chu hman tangkai a la ni lo va. Hetihlai hian smart city hnuaiah Aizawl khawpui chhungah CCTV 266 vuah a ni tawh.

ZALEN  RTI zawhna, UD&PA department SPIO-in a chhan danin Aizawl Smart City Ltd. hnuaia pelican crossing siamna atan hian Rs. 61,71,872 ruahman a ni a, sumte hi Ministry of Housing & Urban Affairs, Govt. of India (90%) leh Mizoram state Govt. (10%) atangin hmuh a ni a, tun thleng hian he project atan hian Rs. 61,03,120 hman a ni tawh.

Pelican crossing hi Chanmari West, Millenium Centre, Civil Hospital, AR Ground gate, Israel Point, Police station Babutlang leh Bawngkawnah pakhat theuh leh Treasury Square-ah pahnih dah a ni a, a siamtu company chu M/s Innovation, East Shalimar Bagh, New Delhi an ni a, hmanruate hi contractor supply a ni.

ZALEN thudawn danin Aizawla Pelican crossing system bun ang chi hi a system a fuh tawk lo a, hmunpui lam atanga control theih ang chi a nih loh avang leh traffic police-in a hmuna dinchilha control ngai a nih avangin mihring tha a heh a, chumi vang chuan hman tangkai hleih theih a ni lo a, a khawl pawh chhia pawh a awm nual tawh nia thudawn a ni.

SPIO chhan danin Aizawl khawpui chhunga CCTV vuah hi Integrated Command Control Centre project hnuaia peng pakhat niin project cost GST telin, Rs. Vbc. 117.98 a tling. 

Sum hi Smart City Mission, MoHUA atanga hmuh a ni a. CCTV vuah mekte hi a la hmantlak a, a tha tawh lo a nih erawh chuan contractor-in kum nga chhung a enkawl zui dawn avangin thlak zel tur a ni.

CCTV-te hi Aizawl khawpui chhung hmun 76-ah fixed camera 237 leh Plant Tilt Zoom (PTZ) camera 39 vuah a ni tawh a, tuna hman mekte hi kum 2022 chhunga vuah zawh a ni.

Pelican Crossing : Aizawl

Hman theih turin zawh fel a ni tawh.

July 17, 2020-ah hawn ni tawhin Aizawl Smart City-in tun thlenga hman tangkai a la nih loh chhan a hre lo.

February 9, 2020-ah Traffic Police-ah hlan chhawn a ni tawh.